Endamê Konseya Rayberdişî ya KCKyî Musatafa Karasuyî programêkê taybetî yê Medya Haber de rojdem erjna.

Karasuyî verî Sirri Sureyya Onderî rê şîfa waşte wina vat: ''Sirri Sureyya Onder bado ke wedarîya nêweşxane  Kurdîstan û Tirkîya de her kes wayîrê ci vejîya. No wayîrvejîyayîş paşatdayîşê Vengdayîşê Haştîye û Komelê Demokratîkî yê Rayber Apoyî bi. Wezîfeyo zaf muhîm rayra bêno, coka wina yeno wayîrvejîyayene. Ma hêvî kenê ke Sirri Sureyya Onder beno weş û têkoşînê xo rê dewam keno.''

Karasuyî bale ante Konferansê ''Rayber Apoyî rê Azadîye Meseleya Kurdan rê Çareserîye'' ya Roma ser ke 11ê nîsane de ameye kerdene û wina dewam kerd: ''Nê konferansî de Kampanyaya Azadîye ameye erjnayene û qerarê xurkerdişê kampanya ame girewtene. Reyna ame vatene ke Rayber Apo do sey namzedê Xelata Nobelî bêro ramojnayene. Ma nînan selam kenê. Rayber Apo hinî têna rayberê kurdan nîyo rayberê azadîye û demokrasîyî yê heme merdimîye yo. Kam ke paradîgmaya Rayberîye nas keno wayîrê ci vejîyeno.''

 Musafa Karasuyî derheqê prosesî de yo ke  mabênê Rayber Apoyî û dewlete de ame destpêkerdene, nê vatî: ''No ameyoxê Tirkîya û Rojhelatê Mîyanênî eleqedar keno. Înan bi xo vat senî muhîm o. Vat 'Wa bêro meclîs de qisey bikero û dima heqê hêvî bikewo dewre.' Înan soz da, vat eke vajo wa rêxistine xo fes bikero, heqê hêvî do bikewo dewre. No têna sozê Bahçelî nê sozê îqtîdarî yo. Çunke îqtîdarî paştî daye Bahçeliyî. No vengdayîş Bahçeli û Erdoganî pîya plan kerd.

Rayber Apoyî veng da û cade dima ra rêxistina ma zî PKKyî zî vengdayîşê Rayber Apoyî qebul kerd. Dima ra HPGyî adirbirnayîş îlan kerd. Gerek cade tecrîd biameyêne wedaritene la pêvînayîşo bîn badê 40 rojan ame kerdene. Na kêmastîya hukmatî ya. Hema zî dewlete gamêka pratîke nêeşta. Rayberîye çîyo ke vano vat, rêxistine zî çîyo ke vana vat, rayrapêroyîye zî wayîrê prsosesî vejîyeno. Partîya tewr pîle ya muxalefetî ya Tirkîya zî paştî dana ci, vana wa bêro meclîs. Eke meseleya kurdan ya zî meseleyêka bîne  yena çareserkerdene gerek bêro meclîs. Meseleya kurdan gerek meclîs de bêro çareserkerdene.

Ma verî zî vatbi ronayoxê na partî Rayber Apo yo  û heta ke o kongre kom mekero  PKK nêeşkeno qerar bigîro. Coka Rayberîye gerek aktîf tewrê kongre bibo. Na kongre bi yew di rojan nêbena. Eke kongre kewta ewey no rîyê hukmatî ra yo. Înan şartê kongre nêardî ca. Partîyê muxalîfî, hêzê demokratîkî paştî danê, heta hêzê mîyanneteweyîyî zî paştî daye prosesî. O wext eke meseleya kurdan, meseleya demokratîkbîyayîşê Tirkîya nêameyî zemînê huqûqî, semedê nê meclîs dewre nêkewto berpirsîyarê nê xora hukmat o. Seba ke proses bêro averberdene meclîs gerek bikewo dewre.

Badê adirbirnayîşê ma gerek hêrişî biameyêne vindarnayene. Wextê prosesê 2013yî de amebî vindarnayene. Şima bi serran şer kerd û ser nêkewtî. Nika kewtî qehremanîya erjcanî dima. Rayberîye veng da û adirbirnayîş ame îlankerdene. Hema zî pê helîkopteran hêzênê ma yê gerîla ra vanê teslîm bibê. Şima nêşarmîyenê, samîmîyetê şima ho ça. Nê gerîlayî teslîmê şima benê? Vanê qey badê vengdayîşê Rayberîye eke ê wina bikerê gerîlayan teslîm genê. Bi nê famî no şer 50 serrî yo dewam keno. Bi nê famî meseleya kurdan nîna çareserkerdene. Bi qehremanîya ercan prosesî sabote kenê. Xora eke wina bikerî gerîlayî zî bi hewayêkê fedayîyî şer kenê. Eke wina dewam bikero gerîlayî do cewabanê giranan bidê înan. Wina nêben. Ma adirbirnayîş kerdo ti wazenî çîn bikerî.  Eke wina şiro gerîlayî dahîna xurt do cewab bidê. Çunke wextê adirbirnayîş de hêrişkerdiş eslê xo de planê îmhayî yo. Gerîlayî do cewabo ke hewce keno bidê.''