Endamê Komîteya Rayberdişî ya PKKyî Murat Karayilanî Radyoyê Dengê Welat de rojdem û bi taybetî weçînayîşê 14ê gulane ercnayî.

Qiseykerdişê Murat Karayilanî ra tay noqtayê girîngî wina yê:

''Selahîyetdarê dewleta tirke pê israrî tecrîdê vera Rayber Apoyî rê dewam kenê. Dişmenî pê tecrîdî armanc kerd ke îradeyê kurdan bişikno, têgêrayîşê ma tasfîye bikero, destkewteyanê kurdan çin bikero û şarê kurdî teslîm bigêro. La dişmen nêeşka armancanê xo bîyaro ca. Ma weçînayîşanê 14ê gulane de dî ke şarê ma îradeyê xo reyna veto werte. Ancî rixmê nê tecrîdî zî fikr û paradîgmaya Rayber Apoyî seba pêro bindestanê dinya bîyê hêvî. Coka polîtîkaya tecrîdî bênetîce mende.

Ez şexsê embaz Hakî Karerî de pêro şehîdanê menga gulane bi rêzî yad kena. Ma do heta peynî şehîdanê xo teqîb bikerê, armancê înan bîyarê ca û têkoşînê înan ser bivisnê. Têkoşînê ma xêrê keda şehîdan ra hende pîlêr bîyo. Ganî raştîya şehîdan hol bêra famkerdene; çunke şarê ma binê fermanê qirkerdişî de yo û welatê ma binê îşxalî de yo. Hetê bînî ra Rayberê ma zî binê tecrîdî de yo. Coka ganî ma wayîrê vîrameyîşê şehîdan vejîyê. Partîya ma PKK zî seba vîrameyîşê embaz Hakî Karerî ronîya. Şehadetê embaz Hakî Karerî bi wesîleya partîbîyayîş û têkoşînê çekdarî. Rayber Apoyî seba Hakî Karerî vatêne 'O ruhê min o nimite yo.' Rayber Apo bi xo perwerê şehîdan o. Têkoşînê ey ê Îmraliyî zî nimûneyê ney o. Yanî şehîdê ma çimeyê ma yê hêzî yê, ê fermandar û serkêşê ma yê. Eke ewro ma Herêmanê Pawitişî yê Medya de ser kewtê, no xêrê ruh û tewirê fedayî yê şehîdan ra yo. Xoverdayîşê ma xeta şehîdan de dewam keno. 

Weçînayîşanê 14ê gulane de tewr zaf na netîce vejîyaye werte ke polîtîkayê AKP-MHPyî yê vera şarê kurdî ser nêkewtê. AKP-MHP 8 serrî yo vera şarê ma û têgêrayîşê ma Planê Çokdayîşî ano ca. Îqtîdarê AKP-MHPyî kerd ke bi nê hawayî şarê ma çok şoro erdî ro û îradeyê xo teslîm bikero. La weçînayîşanê 14ê gulane mojna ke şarê ma çok nêşîyo erdî ro û îradeyê xo veto werte. Coka ez şarê ma fîraz kena. Şarê ma mojna ke seba awankerdişê ameyoxê xo qerardar o.

Xora tay kêmasî û xeletîyî zî qewimîyayî. Ganî nê kêmasî û xeletîyan ser de bêro vindertene. Ganî hîna bi rêxistinkerdeyî û hîna bi xurtî şarê ma û têgêrayîşê ma bixebitê. Şarê ma ganî îradeyê xo hîna zaf eşkera bikero û rayîr nêdo faşîzmî. Ma pê bawer ê ke şarê ma wina do bieşko netîceyanê holêran bivisno destî. 

Îqtîdarê AKP-MHPyî 8 serrî yo keno ke her ca de gerîlayan tasfîye bikero, Rojawan û Şingal de Îdareyê Xoserî çin bikero û Mexmûr de têkoşînê şarî bişikno. La ewro gerîlayî Herêmanê Pawitişî yê Medya û Vakurê Kurdîstanî de cayanê xo de yê. AKP-MHP pê zûran xo sey serkewte mojneno û ney keno malzemeya weçînayîşî zî. La di serrî yo ê nêeşkayî Zap, Avaşîn û Metîna de hukmî bikerê. 

Gerîlayê Vakurê Kurdîstanî zî asta tewr pîle de fekadarî kenê, rayîr nêdanê dişmenî. Tewr peyên Bagok de dişmenî operasyon kerd la 8 leşkerê ci kişîyayî. Besta de 15-16ê gulane de operasyon qewimîya la hema ma netîceyê net tam tesbît nêkerdî. Vanê 5 gerîlayê ma şehîd bîyê. Goreyê tesbîtanê ma di embazê ma şehîd bîyê. Ma do agahîyanê raştan qetî şarê xo de pare bikerê. 

Seke zanîyeno ma heta weçînayîşan bira çalakînêkerdişî dabî û no tewirê ma hema zî dewam keno. La artêşa tirke bêmabên hêrişanê xo rê dewam keno. AKP-MHPyî xora pêro kampanyaya xo ya weçînayîşî dişmenîya kurdan ser o naya ro. Ê ma sey dişmenanê Tirkîya mojnenê la çîyo winayên çin o. Ma wazenê Tirkîya demokratîk bikerê û bikerê ke şarê kurdî pê nasname û îradeyê xo biciwîyê. A raşte mesuldarê pêro nê mergan AKP-MHP yo. AKP-MHP pê cenazayan propaganda keno. Erdogan mesuldarê nê cenazayan o.''