Endamê Komîteya Rayberdişî ya PKKyî Murat Karayilanî ANFyî rê qisey kerd û şerê Herêmanê Pawitişî yê Medya ercna.

Ercnayîşê Karayilanî wina yê: 

''Tarîxê têkoşînî de reya verêne 5 mengan ra zafêr o heman mewzî de şer yeno kerdene, xoverdayîş est o. Dewleta tirke pê destekê warê mîyanneteweyî û pê çeka kîmyewîy, gazê kîmyewî, bombaya nuklere û fosforî hêrişê ma kena. La reyna zî ser nêkewena. Nika sere de Girê Amediyê, Girê Hakkarî, Girê FM, Girê Cudî, Şikefta Brîndara, Karker, Werxelê, Çemço û Sîda de her ca de şerêko pîl est o. Ma hê pê îradeyî û taktîkanê xo yê afernayoxan vera teknîk û teknolojîya dişmenî şer kenê. Gerîlayî bi fedakarîyêka pîle xo ver danê. Dişmen tersî ra nêeşkeno serê erdî ra şoro coka hewayî ra yeno. No xoverdayîş do îlham bido û tarîxî ser de bêro nuştene. Nê xoverdayîşê 5 mengan ra nêbîyêne dewleta tirke rew ra dekewtêne Zap, Metîna û Avaşînî.

Dewleta tirke debikewa kamca uca de rayîran virazena yanî xo kena mende. Dewleta tirke dima ke Başûr û Rojawanî bîyî wayîrê statuyî teberê sînoranê xo de hêrişê kurdan kerd. Dewleta tirke bi nê hewayî konseptê çinkerdişî da destpêkerdene û 2015 de vera ma şer îlan kerd. Dewlete bi zelalî ana ziwan ke armancê înan resayîşê sînorê Mîsak-i Mîlî. Vanê ê hê herêma tamponî awan kenê la no zûr a.

Erd çîyo fîraz o. Wexto ke dewleta tirke konseptê çinkerdişî dabi destpêkerdene ma PDKyî de pêvînayîş kerd û ma ê hişyar kerdî. Mi bi xo di reyî kombîyayîşanê neteweyîyan de qisey kerd. La PDK nêame. O çax ma fam kerd ke PDK ha Tirkîya de pêvînayîşî keno. Na rewşe bîye sebebê parçebîyayîşê kurdan. Vera nê parçebîyayîşî ma xîret kerd la heyf ke rewşe bîye xirabêr. Wa PDK bizano ke dewleta tirke wextê Osmanîyan de zî wextê Komare de zî tim kurdê ke hemkarê ci bîyê, tasfîye kerdî. Yanî dewleta tirke rojêke do seba tasfîyeya Barzanîyan zî bixebita. PKKyî ra nêbîyêne dewleta tirke kurdî hende nêzdîyê xo nêkerdêne. Dewlete seba ke vera ma şer keno xo nêzdîyê PDKyî kena. Dewlete nika Başûrî îşxal kena la PDKyî ra veng nêvejîyeno. PDK tim ma sûcdar keno la verê dewleta tirke de fekê xo anêkeno. Destekê PDKyî yê bi Tirkîya verê çareserîya meseleya Vakurî zî qefilneno. Yanî PDK nêverdeno ke ma dewlete qels bikerê. PDK pê paştdayîşê xo keno ke dewlete gerîlayan qetil bikera. Ma hê şer kenê la PDK vera ma hetkarîya lojîstîk, îstîxbarat dano dewlete, rayîran qefilneno, gerîlayan gêno mîyanê ablûqa. Wa PDK çira wina keno îzeh bikero. Wa her kes bizano ke PKK têgêrayîşê bi mîlyonan kesan o. Wa PDK PKKyî nêgêro dûştê xo. PDK çira dişmenîya PKKyî keno? PDKyî kamyew şertan ser o dewlete de pêkerdo? Wa PDK bizano ke na rewşe fayde nê zerar do bida ci. Eke ma de yew meseleya ci est a wa PDK bêro ma dîyalogan bikerê. Sîyasetê PDKyî xelet o. Wa PDK nê nêzdîbîyayîşî ra fek vera bido, nê rayîrî ra abigêro.

 Amedîyê de 3 mewzîyê ma est ê. Dişmen seba ke nêeşka nê mewzîyan bigêro PDK kewt dewre. Seba ke reyna birakûjî nêqewimîya ma bi hesasî têgêrenê la PDK wina nêkeno. Ma do peynîya peynî de dewleta tirke bin bivisnê. Dewlete zî naye hol zanena coka PDK visnena dewre. PDK Amedîyê de dewlete rê baregehan virazeno, her ca de leşkerê tirkî est ê. PDK de wijdan çin o. Amedîyê de seba dewlete rayîran virazeno ka vano ê seba xo virazenê. Ma nê şerî de qetî xo apey nêancenê û do nêancê. Wa PDK qarişê nê şerî nêbo.

Serebûtê Gelîya Balîsanî ra dima ma eşkerayîye daye û venga înan (PD) da ke eke embazê ma yê birîndarî destê înan de yê wa bidê ma, îna hêrişê gerîlayan kerdo yan nê eşkera bikerê. La înan cewab nêda ma. Par zî 2 komê ma raştê dafika înan ameyî. Ez reyna venga PDKyî dana ke wa cenaza û birîndaranê ma bido ma. Ma nêwazenê sey Qerargehî fermanêkî bidê la wa PDK nêro ma ser. Ma şarê xo rê lomeyê xo kenê. Na rewşe do biba giranêr wa şarê ma zî bi hîsgerî nêzdîyê na mesele biba. Ma seba menfeatanê neteweyîyan şer kenê. Ma babete şarê xo rê îzeh kerd. Coka wa her kez mesuldarî û erkê xo bîyaro ca. 

Ma pabesteyê şarê xo yê. Ez sere de şarê Behdînan û Başûrî venga şarê Kurdîstanî dana ke wa mesuldarîya xo bîyarê ca. Şerê Zap, Metîna û Avaşînî pêro kurdan eleqedar keno. Ma vatêne qey PDK Avaşîn de do paştî bido ma la wina nêbi. La şarê ma ra pawitiş û hêvîya ma est a. Gerîlayî çar parçeyanê Kurdîstanî ra yê. No şer şerê şarî yo. Embazê ma Başûrî û pêro parçeyanê Kurdîstanî pawenê. Nê şerî de domanê şarê erebî zî sey gerîlayan cagênê. Yanî serkewtişê nê xoverdayîşî do fayde bido her kesî. Ganî paştî bêra dayene nê xoverdayîşî. Paştî nêra dayene zî hetê dişmenî de çew tênêgêro.

Ma reyna venga şar, roşnvîr, hunermend, sîyaasetmedar, ciwan û cinîyan, eşîran, wayîrwijdananê Kurdîstanî danê ke vera na rewşe bêveng nêmanê. Ma hê prosesêkê tarîxîyî de yê û ma hewceyê yewîya neteweyî yê. Ma do heta peynî vera îşxalî xo ver bidê. Dişmen ho Îmrali de Rayberîye rê teda keno la Rayberîye xoverdayîş û têkoşînê xo rê dewam kena. Ma zî hê Zap, Avaşîn, Marînos û her ca de xo ver danê. Embazê ma zîndanan de xo ver danê, sîyasetmedarî xo ver danê. Yanî no xoverdayîşêko tarîxî yo. Ganî her kes dest bido destî û ma pîya yewîya neteweyîye aver berê.

Ma 18 mengî yo Rayber Apoyî ra xeberêke zî nêgênê. Zîndanî ra her roje cenazayî vejîyenê. Yanî polîtîkaya zulmî vera embazanê ma yena caardene. Dewleta tirke hêrişê şarê ma, xozaya Kurdîstanî û gerîlayan  kena. Wa şarê ma vera ney vejîyo meydanan, dezgehî bêveng nêmanê. Na babete de kêmîyî est ê. Ma hê prosesêkê îstîsnayî de yê. Nê 3 mengê verê ma zaf krîtîk ê. Ma wazenê netîce bigêrê. Nê prosesî de destê kamî ra çi yeno ganî bikero. Cinîyî wa tewrê gerîlayan binê, cinî û welatperwerî wa erkê xo bîyarê ca. No xoverdayîşo 5 mengan serkewtişî qetî keno. Ganî ma nê prosesî de hîna zaf xîret bikerê û tewrê xoverdayîşî bibê. Eke wina bibo ma do serkewtişanê pîlan bivisnê destî.

Nê esasî ser o ez her kesî rê serkewtiş wazena.''