Fermandarê Qerargehê Merkezê Pawitişê Şarî Murat Karayilanî bi wesîleya Newroze û Hewteyê Qehremanîye Gerîla TV de xîtabê heme gerîlayan û seyrkerdoxan kerd. Qiseykerdişê Karayilanî ra tay nuqtayî wina yê:

''Hemrayê erjîyayeyî, ma nika Hewteyê Qehremanîye de yê. Seke yeno zanayene 21ê Adare Neworze ra heta 28ê adare roja şehadetê Fermandarê ma yê bêmergî Egîdî (Mahsum Korkmaz) sey Hewteyê Qehremanîye ame îlankerdene. Raşta zî bi xovrdayîş û têkoşînê nê demî destanê qehremanîye ameyî afirnayene. Çalakîya ke hemra Mazlûm Doganî  1982 de Zîndanê Amedî kerde vejîyayîşo tarîxî bi. O vera zilmî serewedaritiş bi. Bi ruhê Neweroze pîrozkerdişê Newroze bi. Dima ra 18ê gulane de çalakîya Ferhat Kurtay û hîrê embazan û serkêşîya Mehmet Hayrî Durmuş, Kemal Pîr, Akif Yilmaz û Alî Çîçekî de çalakîya girde ya 14ê Temmuze ameye kerdene û dişmen kelaya zilmî bin kewt. Îradeyê şorişgêran, îradeyê Apoyîyan ser kewt.

Hemleya 15ê Tebexe ya ke 1984 de ameye kerde tarîxê têkoşînê şarê ma de dewrêko newe bi. Serkêşîya fermandarê girdî Egîdî de Eruh û Şemzînan de çalakîyê ke ameyî kerdene têkoşînê estbîyayîş û azadîye yê kurdan de dewro newe da destpêkerdene. Hemra Egîdî têna yew çalakîye nêkerde, gerîlatîye aver berde. Ma serrgêra 37. yê şehadetê ci de şexsê hemra Egîdî de şehîdanê şorişî yad kenê û vanê ke ma tifingê înan erdî de meverdê û xeyalanê înan bîyarê ca.

Xeylêk hemleyê têgêrayîşê ma bi Newroze û Hewteyê Qehremanîye dest pêkerd. Yew sereyê Hewteyê Qehremanîye Mazlûm Dogan sereyê ci yo bîn hemra Egîd o. Zereyê nê hewteyî de zaf qehremanê ma est ê. Ma pê nê qehremananê xo yê erjîyayeyan sereberz ê. Nê şehîdanê ma yê qehremanan semedê azadkerdişê welat û şarê xo, ganê xo feda kerd. Gerek ciwanê Botan û Serhadî, ciwanê Kurdîstanî, ciwanê herême nê qehremanan taqîp bikerê. Wa ciwanî her ca de tewrê têkoşînî bibê, serkêşîya serhildanan bikerê û tewrê sefanê gerîlayan bibê.  Geîlayê Azadîye yê Kurdîstanî ewro têkoşînê tarîxî kenê.

Hemrayê erjîyayeyî, na Newroze de zî Efrîn de qirkerdiş ame kerdene. 5 serrî yo Efrîn de tim îşkence, remnayîş û merg est o, zilm est o. Heta nika bi seyan merdimê ma bi destê çeteyanê dewleta tirk a faşîste ra şehîd bîyî. Tewr peynî de çar merdimanê ma yê welatperweran gama ke adiro bimbarek ê Newroze  tafînayêne raştê hêrişî ameyî û înan ra tay şehîd bîyî. Ma nê qirkerdişî şermezar kenê û medimanê şehîdan rê serweşîye wazenê.

15ê adare de qezaya Duhokî yê Behdînan de qezaya helîkopterî qewimîya û fermandar Şervan Kobanê zî tede 9 endamê QSdyî şehîd bîyî. YAT dezgehê antî-terorî yo ke têkoşînê vera DAÎŞî de xo îspat kerdo. Ma eşnawit ke nika tay ciwanê kurdan pîlotîye  mûsayî wesayîtanê hewayî şuxulnenê. Ma pê nê zaf şa bîyî. Şehadetê nê ciwanan dejê heme kurdan o. Ma fermandarîya QSD û merdimanê nê şehîdanê erjîyayeyan rê serweşîye wazenê.

Çi heyf ke ma vînenê tay selahîyetdarê Başûrê Kurdîstanî bêhurmet qala nê babete kenê. Mabênê kurdan de senî mesele benê wa bibê gerek nêzdîbîyayîşo winayên mebo. Ma mesela wina bi dejê giranî de gerek çirey çîyo winayên mebo. Merdim pê na dişmenî şaş maneno. Kam ke şahadetê şervananê kurdan ra dej nêanceno, gerek kurdîtîya ci ra bêro şikkerdene. Nê ciwanan xo perwerde kerdo,resnayo, gama ke şinê raştê firtine yenê û rayîrê xo şaş kenê û ginenê war. No dej o. Ma hêvî kenê ke her kurd semedê azadîye û xelisnayîşê kurdan xebitîyeno. Ruhê welatperwerî û ruhê yewîya neteweyî xurt keno. Na çarçewe de Ma ruhê şehîdan yad bikerê û Kurdîstanê Azadî ronê. Ma ra no yeno pawitene.

Embazê erjîyayeyî, serra 2022yî semedê Gerîlayanê Azadîye yê Kurdîstanî serra têkoşînê girdî bî. Serrêka destankî bî. Têkoşînê na serre heme Kurdîstan de bitaybetî têkoşînê Zap, Avaşîn û Metîna polîtîkayê îşxal û qirkerdişî yê dişmenî betal kerdî. Xora semedê nê bedelê girdî ameyî dayene. Xeylêk destanê qehremanîye ameyî afirnayene la şarê kurdî destkewteyê girdî fînayî dest. Ma wina kewnê serra 2023yî. Emser  zî do têkoşînê ma dewam bikero. Xora pîrozkerdişê Newroze mojna ra, emser do biba serra netîcegirewtişî. Na çareçwe de ez bi ruhê Hewteyê Qehremanî şima silam kena û serkewtiş wazena.''