Endamê Komîteya Rayîrberdişî ya PKK’yî Murat Karayilanî televîzyonê Medya Haberî rê qisey kerd û rojdemê sey Hewteya Qehremanîye, çalakîyê grevê vêşnaîye û weçînayîşê herêmîyî ercnayî.

Karayilanî cewab da persanê rojnamegere Çinar Goktaşe û destpêkerdişê qiseykerdişê xo de wina va: ”Ez şexsê embaz Egîdî de pêro şehîdanê şorişî bi hurmet û mînetdarîye silam kena. Soz û qerardarîya ke ma daya înan ez reyna ana ziwan. Hewteyê Qehremanîye yê hêzanê xoverdayoxan, cinîyan, şarê û ciwanan pîroz kena. Hewteyê Qehremanîye, tarîxê ma de wayîrê cayêko taybetî yo.”

Karayilanî çarçewayê Hewteyê Qehremanîye de bale ante xoverdayîşanê grevê vêşanîye ser û wina va: ”Hewteyê Qehremanîye, nê xoverdayîşî qehremanê sey Zulkuf Gezenî, Ayten Beçete, Zehra Saglame, Medya Çinare û Ugur Şakarî afernayî. Bi nê qehremanan, xoverdayîş rest manayêka pîle. Nika ra bingehê serkewtişî ameyo eştene. Xeta Masûm, Mazlûm û Zîlanan Kurdistan de bîya bingehê fedayîbîyayîşî û ewro şarê Kurdistanî bi çalakî û hêrsê xo musneno ke ruhê fedaîyîye bîyo vila û no ruh bi xo bîyo temînatê serkewtişî.”

Ruhê xoverdayîşî nika ra mîjdanê azadîye dayo

Na rewşe musnena ma ke na dawa wayîrê bingehê zexmî ya tarîxî û rojane yî ya. Wayîrê ferasetê felsefîk û îdeolojîkî ya û coş û kelecanîye kena pîl. Xora no ruho ke hetê Mazlûman, Egîdan ra ameyo afernayene, bîyo rastîya kadro û sempatîzananê ma. Ruhê xoverdayîşî yo kle ewro şexsê Leylayan, Nasir Yagizan de bîyo eşkera, mîjdanê serkewtişê mucadeleyê azadîye yo. Kifşo ke no xoverdayîş do hîna bibo pêt û serkewtişî bîyaro.”

Reyê Edogan- Bahçelîyî bibê kêmî û meşruîyetê înan do nêmano

Karayilanî derheqê weçînayîşê 31’ê Adare de zî wina qisey kerd: “Erdogan û Bahçelîyî dî ke sîstemê înan o dîktatorî do  bi nê weçînayîşî bikewo rewşêka xirabe û ê do bikê vîndî. Înan fehm kerdo ke: eke reyê înan se ra 50’î ra ke bêrê war, sîstemê înan do meşruîyetê xo vîndî bikero û naye ra zî bi ters têgêrenê. No proses xo rê kerdo prosesê mendene û nêmendene. Bi no qeyde pêro qaîdeyê exlaqîyî binpay kerdî.

Bi binpaykerdişê qanûnan kenê ke xo rê rayîrêko newe akerê û netîce bigîrê. Bi hîsîyatê merdiman kay kenê, îstîsmar kenê, mabênê şarî de şovenîzmî kenê vila û bin o qeyde kenê ke reyanê xo bikê zêde. Kurdan sey dişmen hedef musnenê û propagandaya qilêrine ramenê. Înan dest de çiyo ke bidê komelî nêmendo. Xitimîyayê. AKP, AKP’yê verî nîyo û xo eşto virana MHP’yî. Yewbîyayîşê înan tena seba nê demî nîyo. Ê do heta peynîyê wina şorê. No çiyêko stratejîk o. Bahçelî na rewşe ver zaf zerrîweş o. Çunke AKP teslîmê MHP’yî bîyo û MHP bi xo yo.

Seba ke Kurdan bikişo, Kurdan ra reyan wazenê

Wazenê ke dest binê îradeyê şarî ser. Şarê ma ganî naye baş bizano û goreyê naye tê bigêro. Xora welatperwerî bi xo zanê se bikê, ganî bixebetîyê. AKP-MHP çira reyanê Kudan wazenê, ganî baş bêro fehmkerdene. Seba ke Kurdan bikişê, Kurdan ra reyan wazenê. Vanê “ Reyanê xo bidê ma ke ma Qendîl û Şengalî qirbikerê û bikê goristan. Ganî merdimê wayîrê dîn û wîjdanî nêbê şîrigê nê sûcî. Eşkera vanê ma do şer bikê, ma do hêrişê Rojawanî bikê, mado hêrişê Kurdistanê Başûrî bikê. Xora seba şerkerdişî reyan wazenê.

Nêşîyayîşê sere sindoqan yeno manaya reya xo AKP’yî dayîşî

Tayê hetî vanê ma do nêşorê sandoqan ser û reyanê xo nêerzê ci. Na şaşîyêka pîle ya. Ha şîma reyê xo daye AKP’yî ha şima nêşîyê sandoqan ser. Her diyî zî eynî çi yê. Kam yeno weçînayene zaf muhîm nîyo, çiyo muhîm o yo ke ganî verê pêla faşîzmî bêro girewtene. Merdim ganî verê serdestîya faşîzmî de bivindo.

Hamleyê Gerîlayî do rayîrê netîceyê muhîmî akerê

Ma Cûdî û Tendurek de ey fatasnayî. Înan hem Cûdî de, hem Serhed de hem zî Gabar de derbê giranî girewtî. Emser seba gerîla serrêka muhîme ya. Gamê muhîmî yenê eştenê û gerîlayî seba prosesê neweyî amade yê.”