Endamê Komîteya Rayberdişî ya PKKyî Murat Karayilanî cewab da persanê ANFyî û rojdem ercna.

Qiseykerdişê Karayilanî ra tay noqtayê girîngî wina yê:

''AKP-MHP-Ergenekonî 2015 de Planê Çokdayîşî vist dewre û armanc kerd ke şarê kurdî û têgêrayîşê azadî bêtesîr bikerê. Coka tecrîdê Îmraliyî ame girankerdene, kurdî raştê hende hêrişî ameyî û şerêko pîl dîya destpêkerdene. Seba ney zî binê nameyê 'Sîstemê Serekîye' ame ardene. Rixmê destekê NATOyî, hêzanê teberî û kurdanê xayînan zî no plan ser nêkewt. Xoverdayîşê gerîlayan planê înan pûç kerdî. Vera 'şerê topyekûnî', 'xoverdayîşo topyekûn' dîya destpêkerdene. AKP vano ke serkewto la zûran keno. Çunke şerê Zapî de înan xo tîya ra apey ant. Reyna ma vera 'ÎHA-SÎHA'yanê înan taktîkê afernayoxî ardî ca. Seba ke ê pê nê xoverdayîşî nêeşkayî nêeşkenê îrade û hêzê şarê kurdî zî bişiknê. 

AKP-MHP hema zî 'Planê Çokdayîşî' de israr keno coka qasê 150 merdimî destbend kerdî. Îqtîdar keno ke hêz û tesîrê şarê kurdî bişikno. Îqtîdar nêeşka weçînayîşan ra verî Rojawan de yan zî herêmanê gerîlayan de ser bikewo coka mîyanê şarî de wina alozîye vejeno. Nê operasyonê destbendkerdişî weçînayîşanê 14ê gulane rê mudaxele yo. Îqtîdar pê nê destbendkerdişan keno ke çimê Partîya Çep a Keske, Îtîfaqê Kede û Azadîye û Îtîfaqê Demokrasî û Azadîye bitersno. Muxalefetê Tirkîya zî vera nê kerdişan tewirêko raştikên hema nêmojna. La îqtîdar do nêeşko pê nê kerdişanê xo ser bikewo.

Reyna îqtîdarê AKP-MHPyî armanc keno ke weçînayîşan ra verî Îran û Sûrîye reyde pêkerdişêk bikero, bi nê hawayî zî xo serkewte bimojno. Nê halê Sûrîye ra tewr zaf Tirkîya mesuldar a. Coka Sûrîye zî xo nêzdîyê dewleta tirke nêkena. Îqtîdarê AKP-MHPyî nê 8 serran de pê şerî Tirkîya mehf kerde. Hînî îqtîdar se bikero zî nêeşkeno ser bikewo.

Şarê kurdî û hêzê demokrasî vera nê hêrişanê îqtîdar wa cade tewir bigêrê, herinda vengîyan debikerê, bi xurtêrî xebatanê weçînayîşî rê dewam bikerê. Beno ke hêrişê îqtîdarî bizêdîyê. Şarê kurdî û dormeyê demokratîkî ganî bi qerardarî vinderê û pê xurtkerdişê xebatanê xo cewabê îqtîdarî bidê. 

AKP PKKyî sey şeytanî mojneno û kam xo nêzdîyê PKKyî bikero ey krîmînalîze keno. La seke îdareyê ma vato heta nika tewr zaf AKPyî ma de têkilîye viraşte. 2005 ra heta 2015î yanî 11 serran AKPyî ma de têkilîye viraşte. 2005 de heyetêkê mîyanneteweyî vat ke MÎTî ra kesê bi nameyê Emre Taner wazeno nameyê Erdoganî ser o ma de têkilîye virazo. Seba ke ma çareserîye waştêne no çi qebul kerd. Nê heyetî mabênê ma d emesajî ardî berdî. Dima Belçîka de ma têrî qisey kerd. Êlula 2008î ra heta nîsana 2011î heyetê resmî yê dewleta tirke û heyetê PKKyî pêvînayîşî kerdî. Reyna Oslo de mabênê heyetê ma û heyetê dewlete de pêvînayîşî qewimîyayî. Qeydê nînan est ê. Reyna heyetê dewlete mektubê ma berdêne Îmraliyî. Wisarê 2011î de netîceya muzakereyan de mutabeqatêko hempar virazîya û ma no pêşkêşê dewleta tirke kerd. La cewab nêdîya ney û prosesê şerî newe ra dest pêkerd. A raşte 2010 de pêvînayîşî vindertbî. Dima YNK kewt dewre. Mehmet Emîn Pêncewînîyî Anqara de heyetê dewlete dî û înan bire daye ke 'wa Anqara û Qendîl raşta raşte xetêka dîyalogan ronê.' La ma no qebul nêkerd. Çunke înan armanc kerdêne ke Rayber Apo bêtesîr bikerê. O çax ez Serekê Konseya Rayberdişî ya KCKyî bîya. O çax Serekê MÎTî Hakan Fîdanî waşt ke bêro Qendîlî. Ma reyna qebul nêkerd û vat 'Îmrali Anqara rê hîna nêzdî yo, şorê uca de pêvînayîşan bikerê.' Bi nê hawayî 2012 de pêvînayîşê bi Îmraliyî dest pêkerd. HDP nê prosesî de sey mabênçî têgêra. O çax Rayber Apoyî zî ma zî seba çareserîye zaf xîret kerd. La AKP çareserîye de samîmî nêbi. Meseleya kurdan yew raştîya Tirkîya ya. PKK û Rayber Apo zî muxatabê na mesele yê. Xeletîye nîya ke çew nê muxataban de qisey bikero. La AKpyo ke ma de hende pêvînayîşî kerdbî, bêşerm merdiman seba ney sûcdar keno. 

Muxalefetî heta nika ma de pêvînayîşêk nêkerd û çîyo winayên zî nêwaşt. AKPyî na mesele hende krîmînalîze kerde ke ê tersenê HDPyî de zî ronişê. Îqtîdar sey Rojawanî HDPyî zî seke şirîkê PKKyî mojneno la wina nîyo. Erdogan kesêko kîndar o. Seba ke HDPyî û Selahattîn Demîrtaşî nêwaşt ke sîstemê serekîye bêro Erdoganî ê kerdî hedef. 

AKP-MHPyî û dewleta tirke meseleya Rojawanî de zî heman çi kerd. Hêverî înan waşt ke Rojawanî bigêrê binê kontrolê xo, heta înan Salih Muslim dawetê Anqara kerd. La dima ke Rojawan de Îdareyo Xoser ronîya, seba ke kurdê Vakurî zî ney nêwazê Rojawan sey şeytanî û PKKgîrî ame mojnayene. Yew eleqeyê Rojawanî bi PKKyî çin o. Raşt o ke şarê Rojawanî sempatîzanê Rayber Apoyî yo. La îdeolojîya Rayber Apoyî de 'ronîyayîşê dewletêke' çin o. Rayber Apo konfederalîzmê demokratîkî paweno. Coka ma armanc nêkenê ke Tirkîya 'vila yan zî pare' bikerê. Ma wazenê Tirkîya demokratîke bikerê û kurdî bibê wayîrê statuyê xoserîye. 

AKP îftîra erzeno ma milî û vano ke 'hêzê teberî paştî dano PKKyî.' Na zûrêka pîl a. A raşte peyê dewleta tirke de hêzê teberî est ê. Destek û hetkarîya NATOyî ra nêbîyêne dewleta tirke nêeşkayêne nê şerî hende derg bikerê. Hêzê teberî destek danê Tirkîya coka çareserîya meseleya kurdan zî asteng kenê. Hişmendîya qirkere-nîjadpereste ya dewlete û menfaetê emperyalî şerî kenê dergêr. Dewleta tirke tim pê îdîaya 'destekê hêzanê teberî' kurdî sûcdar kerdî la NATO zî, Amerîka zî û heta Rûsya zî paştî dana dewleta tirke. 

Reyna vanê 'PKK projeyê Amerîka yo.' Çîyo winayên qetî beno? Amerîka xelatîye dana merdeyanê ma ser. Rojawan de hêzê Amerîka û hêzê kurdî pîya vera DAÎŞî şer kenê. La cara Rojawan zî PKK nîyo. Dewleta tirke pê destekê Amerîka dana ma ro la ma sey projeyê Amerîka mojnenê. AKP-MHP û dewleta tirke bi nê hawayî şarî xapînenê, xo kenê mazlûm. 

Cengîz Çandar û Hasan Cemal hol ê ke bîyê namzedê Partîya Çep a Keske. Nê wird rojnamegerî zî çareserîya meseleya kurdan de samîmî yê û hema ke çewî na babete de qisey nêkerdêne înan bi çêrî qisey kerdêne. Dewleta tirke kena ke hêzê kedkar û karkerî yê çepî yê Tirkîya û welatperwerê kurdî nêrê yewca. Wa çew pê nê kayî mexapîyo. Ganî nê wird terefî yew bibê. Bi na wesîle ez Roja Karkeran a 1ê Gulane zî fîraz kena û têkoşînê înan de her kesî rê serkewtiş wazena. 

Rayber Apo lîderê kurdan o û malzemeyê weçînayîşî nîyo. Meseleya kurdan û meseleya Rayberîye ganî çarçewa taktîkanê weçînayîşî de nêrê ercnayene. AKP û dormeyê ci, ge ge zî CHP bi hawayêkê bêhûrmetî na mesele anê rojdem. Tewirê înan raşt nîyo. Wa şarê ma îtîbarê înan nêkero.

Ewropa de raydayîşî dest pêkerd. Nê weçînayîşî zaf krîtîk ê. Ez venga pêro şorişgêr, demokrat û welatperweranê ke Ewropa de yê, dana ke wa qetî şorê sindoqan ser û tercîhê raştikênî bikerê. Bi taybetî wa kurdîstanijê welatperwerî raya xo bidê Îtîfaqê Kede û Azadîye. Eke şarê ma nêwazeno ke bibo hemkarê zulmê îqtîdarê AKP-MHPyî wa sindoqan de vera ci tewirê xo bimojno.''