Fermandarê Qerargehê Merkezê Pawitişê Şarî (MPŞ) Murat Karayilanî  keyeyê Ebuzeyd Abdullahî yo ke 29ê tebaxe de hêrişê dewleta tirke yê vera Mexmûrî de şehîd bi, rê mesajê serweşîye şawit û nê vatî:

Keyeyê şehîdî yo ercîyaye;

Ma eşnawit ke netîceya hêrişê dewleta tirke ya tersuneke de hemra Ebuzeyd şehîd bîyo.  Bi nameyê têgêrayîşê ma heme keyeyî rê, şarê Mexmûrî, mîlîsanê ma yê welatperweran û şarê Kurdîstanî rê serweşîye wazena. Ma sey têgêrayîşê dejê şima bar kenê. Ma sozê xo yê şehîdan newe kenê. Gonîya ci do çirey erdî de memano.

Têgêrayîşê ma yê şorişî de keda hemra Ebuzeydî zaf a. Nizdê 35 serran kede daye. Ez bi şexsê xo 29 serrî yo ke ey sarisnena. Mi xeylêk xebatanê ci rê şahîdîye kerde. Hemra Ebuzeyd sembole welatperwerîye, qehremanîye û fedakarîye yo. Hemra Ebuzeydo ke dewa Dêrahînê yê Botanî û eşîrê Goyî ra yo pabesteyê Rayber Apo, Kurdîstan û şehîdan bi. Hêrişê vera hemra Ebuzeydî hêrişêko normal nîyo. No hêrişêko zafhetin û plankerde yo. Dişmenî şexsê Şehîd Ebuzeydî de welatperwerîya şarê Mexmûrî hedef girewt. Eynî roje Kifrî de mamosteyo welatperwer Şemal ame hedefgirewtene. Şexsê mamoste Şemalî de zî welatperwerîya şarê Soranî ameye hedefgirewtene.

Dişmen welatpererîya şarê kampe ra û tewirê ci ra terseno. Coka Şehîd Ebuzeydo ke sembole welatperwerîye yo hedef girewt. Senî ke par sembolê welatperwerîya Rojawanî Yusuf Gulo ame hedefgirewtene emser zî hemra Ebuzeydo ame hedefgirewtene. Pê nê hêrişan kenê ke welatperwerîya kampe bêro derbkerdene û tesfîyekerdene. Ganî şarê kampe û heme şarê kurdî rayîrê şehîdan de têkoşînî xurtêr bikero. Ganî xopawitiş bêro hêzdarkerdene û vera dişmenî bi hersî têkoşîn bêro kerdene.