Endamê Komîteya Rayberdişî ya PKKyî Murat Karayilanî bi mesajêkî sere de şarê Botan û Riha venga şarê Kurdîstanî da ke weçînayîşanê 14ê gulane de seba netîceyêka rûmetênî ya neteweyî kede bido.

''Şarê ma yê Riha yo ercîyaye!

Rayber Apo mîyanê şima ra vejîya. Ewro fikr û felsefeya Rayber Apoyî pêro dinya de rojdem de yê û seba şaran hêvî yê.  Xora no seba şarê Riha sereberzîyêka pîl a. Kişta Riha de Rojawan est o. Ewro Rojawan de kurdî, erebî, tirkî, armenîyî ûsn. pîya bi haştî ciwîyenê. Şarê ereb û kurdî yê Riha zî ganî mabênê xo amekerê û Riha de yewî û hemkarîya xo awan bikerê. Riha de keyeyê pîlî est ê ke wextêk ê lîderê eşîran bîyê. Teyna domanê înan benê wekîl, zenhîn û şinê Meclîsî. Şarê Riha ganî ney rê vajo 'bes o.' Nê keyeyî pê pereyê şarê kurdî xo kenê weye la kurdan rê fayde nêkenê. AKP-MHP zî pê destekê nê keyeyan vera kurdan şer keno.  Şima bi çimanê xo dî ke Pirsûs de çi ameyo sereyê keyeyê Şenyaşarî. Şima kurd ê. O çax abigêrê kokanê xo ser. Wa şarê Riha hînî peynîya kayanê AKP-MHPyî bîyaro, raya xo medo înan. Şima dî ke hende wekîlê HDPyî est ê la zengîn nîyê, şima ra yê. Şarê Riha wa keyeyanê zengînan xo rê mekero wekîl. Riha de serê lîste de Mîthat Sancar est o. Wa Riha dormeyê Partîya Çep a Keske de bêra pêser û tewirêkê demokratîk bimojno. Ez şarê Riha ra ney pawena. Ez selam û heskerdişî şawena şima, her kesî rê serkewtiş wazena.

Şarê ma yê Botanî yo ercîyaye!

Herêma Botan de Sêrt, Wan, Şirnex û Colemêrg est ê. Heta nika Botanî ra zaf qehremanî vejîyayî. Ez pê bawer a ke şarê Botanî bi ruhê xoverdayîşê Cizîre dekerde yo. Ez şarê Botanî rê serkewtiş wazena û selam û heskerdişê xo şawena. Botan de ganî xebatê hîrayî bêrê kerdene. Ganî Botan de pêro terefî bêrê verarkerdene. Seba ke Botan herêmêka taybet a, dewleta tirke zî Botanî ser de vindena. Coka girîng o ke şima Botan de îradeyêkê kurdîstanî û neteweyî bimojnê. Şarê Botanî polîtîkayanê şerî yê AKP-MHPyî ra xizan bîyo. Ganî pêro eşîrê Botanî, şarê Botanî û keyeyî yew bibê. Çewî ra metersê. Wa her kes pê wijdanê xo raya xo bido. Ma pê bawer ê ke ê kesê ke heta nika seba AKPyî xebitîyayêne hînî do ameyoxî bivînê û şarê xo hetî de cabigêrê. Seke dadîyê ma vanê 'Ma raya xo bidê xo.' Wa şarê ma yê Botanî dormeyê Partîya Çep a Keske de yew bibo. Ez venga pêro kesan dana ke seba ke nê weçînayîşan de netîceyêka rûmetêne ya neteweyîye bêra girewtene xîret bikerê, kede bidê. Ez her kesî rê serkewtiş wazena.''