Komîteya Tekîlîyanê Teberî ya KCKyî derheqê hêrişanê hêzanê Iraqî yê vera Mexmûrî de eşkerayîye daye û nê pare kerdî:

“Dewleta tirka ke herra Başûrê Kurdîstanî vince bi vince îşxal kerdo, plan kena ke heta Musul û  Kerkurkî sinoranê xo hîra bikero. Xora nê waştişanê Erdoganê faşîstî şarê kurdî û Iraq hol zano. Dewleta tirke seba ke operasyonanê xo yê îşxalî heta zereyê Iraqî bîyaro, çîyo ke destê ci ra yeno kena û her firsetî şuxulnena. Bi nê waştişî zî vera şarê ma yê Şingal û Mexmûrî bi hewayêkê sîstematîkî sûcê şerî kena, vera heqanê Başûrê Kurdîstanî û Iraqî bêhurmetîye kena.

Şaro ke Mexmûr de ciwîyeno xora seba ke verê zexanê dewleta tirke de milê xo çewt nêkerdo, kurdîtîya azade ra tewîz nêdayo, bar kerdo şîyo ûca. Nê semedî ra bi serran o şarê Mexmûrî binê zextî de yo. Şaro ke teslîmê dewleta tirke nêbîyo bi zextanê bînan û ambargoyan yeno waştene ke wa teslîm bibo.

Kampa Mexmûrî binê pawitişê Neteweyanê Yewbîyayeyan (NY) de ya. Şarê Mexmûrî tim raştê hêrişanê deweta tirke yeno. Seba ke NY û Iraq vera nê hêrişan vengê xo berz nêvejenê, dewleta tirke zî dahîna zaf hêriş kena. NY û Iraq berpirsîyar ê ke problemanê şarê Mexmûrî çareser bikerê. Seba ke înan berpirsîyarîyê xo nêardî ca û kerd ke serê nê sûcan bîgêrê, ewro nê qewimişyayîşî benê. Pê çekan hêrişê şarî kenê. Nê hêrişî de do probleman girdêr bikerê. Gerek hukmatê Iraqî hêrişan caverdo, dîyalogî esas bîgêro û semedê çareserkerdişê problemanê têbigêro. NYyî zî bi na bêvengîya xo beno hemkarê nê şîdetî. NY gerek cade semedê çareserkerdişê probleman berpirsîyarîya xo bîyaro ca.

Hêrişê vera Mexmûrî xizmetê dewleta tirke kenê ke wazena Kurdîstan û Iraqî îşxal bikero. Goreyê xeberanê ke ma eşnawitî, dewleta Iraqî do hêzê xo yê leşkerî yê dahîna girdî bişawo şarê Mexmûrî ser. Ma hêvî kenê ke nê vatişî raşt nîyê. Çîyo raşt oyo ke semedê çareserîya probleman heyetêk şarê Mexmûrî reyde pêvînayîş bikero. Ma veng danê ke wa heme şaro welatperwer, partî û hêzê  Kurdîstanî wayîrê Mexmûrî bivejîyê û plananê dewleta tirke û PDKyî betal bikerê.”