Hemserekîya Konseya Rayberdişî ya KCKyî  bi wesîleya serrgêra Şorişê Rojawanî eşkerayîya nuştekîye daye.  KCKyî bale ante ser ke bi felsefeya Rayberê Şarê Kurdî Abdullah Ocalanî destkewteyê girdî ameyî destfînayene  û  veng da ke wa semedê wayîrvejîyayîşê şorişî û cewabdayîşê hêrişanê îşxalî yê dewleta tirke têkoşîn bêro xurtkerdene.

KCKyî veng da ke wa meseleyê Sûrîye bi dîyalogî bêrê çareserkerdene û vat eke no bêro caardene planê rijnayîşê Sûrîye û pêverdayîşê şaranê Sûrîye yê Erdoganî yenê betalkerdene.

Ekerayîye de ca dîya nînan: ''Tarîxê 19ê Temmeze ya 2012yî de şarê Rojawanî û hêzanê şorişgêran ê Rojawanî bi qerarêkê tarîxî Kobanê ra dest pê kerd û hemleya azadkerdişê Rojawanî daye destpêkerdene. Na gama tarîxî demê kilmî de bi Şorişê Rojawanî û dima ra bi averberdişê sîstemê demokratîkî yê Vakur û Rojhilatê Sûrîye qedîyaye. Ewro serrgêra 12. ya nê averşîyayîşê tarîxî ya.  Ma Şorişê Rojawanî selam kenê û heme şehîdan bi hurmet, heskerdiş û şukranî yad kenê û soz danê ma do waştişê şehîdan bîyarê ca. Ma reyna enternasyonalîstan zî  bi hurmet û mînetî yad kenê ke çar hetanê dinya ra vazdayî gazîya Rojawanî û semedê pawitişê şorişî şehîd bîyî. Ma sey şarê kurdî  û şaranê Rojhelatê Mîyanênî înan rê deyndar ê.

Merdimîye bi Şorişê Rojawanî bîye wayîrê erjanê neweyan. Verê rayraşîyayîşê azadîye yê şaran, cinîyan û bindestan akerd. Şorişê Rojawanî vera zulm û neheqîye serê mîrasê têkoşînê azadîye yê bindestan ame averberdene. Nê hetî ra qoqê ci tarîxî yê. Bi felsefeya Rayber Apoyî tarîxê şorişî de averşîyayîşê neweyî afirnayî. Şorişê Rojawanî averşîyayîşo tewr muhîm û seserra 21. yo. Şorişê Rojawanî ke sey Şorişê Cinîyan yeno zanayene û sîstemê xoîdarekerdişî vet meydan averşîyayîşo tewr muhîm û bimana yê dewrê ma yo.

Hetê bînî ra Şorişê Rojawanî îdareyê şarî yê demokratîkî yê Vakur û Rojhilatê Sûrîye destpêkerdişî ra heta roja ma vera  her qeyde hêrişan xover da, payra mend û xo îspat kerd. Xora no serkewtiş bi têkoşînê şaran, hêzanê şorişgêran û enternasyonalîstan kewt dest. Nê demî de ke semedê fatisnayîşê şorişî zaf tehluke yî est ê xurtkerdişê têkoşînî zaf muhîm o. Coka ganî têkoşîn bêro xurtkerdene.

Dewleta tirke ya qirkere semedê çînkerdişê Şorişê Rojawanî destpêkerdişê ci ra heta roja ma hêriş kena û na çarçewa de  kewta mîyanê her qeyde tekîlîyanê leyminan. Sere de DAÎŞ çeteyî rêxistin kerdî û verdayê Rojawanî. Seba ke bi çeteyan sernêkewt, narey bi xo hêriş kerd, herra Rojawan û Sûrîye îşxal kerd. Cayê ke îşxal kerdî tede rejîmê dizdîye û zulmî na ro, demokrafya bedilna, her qeyde caardişê vera merdimîye kerdî. Seba ke Sûrîye de çareserîya demokratîke mero averberdene heme metodî şuxilnayî, bi zanayîş bi mîlyonan sûrîyeyîşî ancîyayî Tirkîya, seba ke pêkewtişî xorî bibî çeteyî kerdî weyê, kerd ke şaran biverdê pê û bikero dişmenê yew bînan.

Ma muhîm vînenê ke meseleyê Sûrîye bi rayîrê dîyalog û muzakere bêrê çarserkerdene.  Ma sey têgêrayîşê azadîye paştî danê nê. Eke meseleyê Sûrîye bi dîyalogî bêrê çareserkerdene, planê rijnayîşê Sûrîye û pêverdayîşê şaranê Sûrîye yê Erdoganî yenê betalkerdene. Ma reyna Şorişê Rojawanî zerrî ra pîroz kenê û veng danê ke wa her kes paştî bido Şorişê Rojawanî. Reyna ma veng danê ke vera hêrişê îşxalê dewleta tirke yê vera Başûrê Kurdîstanî wa tewiro xurt bêro girewene û paştî bidîyo şaranê Kurdîstanî.''