Komîteya Têkilîyanê Teberî ya KCKyî, bi eşkerayîyêke hêrişê dewleta tirke yê vera Meydanê Teyarayan ê Silêmanî bi ziwanêkê tûjî şermezar kerd. Eşkerayîye wina ya:

''Têkoşînê azadîye yê Kurdîstanî prosesêkê tarîxî ra derbaz beno. AKP-MHP pê pêro îmkananê xo hêrişê têgêrayîşê ma, hêzanê welatperweran û şarê ma keno la netîceya nê hêrişanê xo de bi xo ameyo verê rijîyayîşî. Nê rijîyayîşî de barê xoverdayîşê Rayber Apoyî, xoverdayîşê gerîlayan pîl ê. Newrode zî ciwan û cinîyan ê kurdan pê xoverdayîşê xo hesabê Erdoganê faşîstî pûç kerdî. No rejîmo ke ver bi rijîyayîşî şino 14ê gulane de do derba peyêne biwero.

Muxtemel o ke rejîmê Eroganî yo ke verê rijîyayîşî de yo, her provakasyonî bikero. Têgêrayîşê ma zaneno ke Erdogan seba ke îqtîdar de bimano eşkeno her sûcî bikero. Coka ma bira çalakînêkerdişî heta 14ê gulane derg kerde. Rixmê ney zî artêşa tirke ya îşxalkere vera Herêmanê Pawitişî yê Medya, Rojawan, Başûr û Şingalî hêrişanê xo rê dewam kena.

Planê dewleta tirke ya îşxalkere pê na bira têgêrayîşê ma, xeripîyayî coka dewleta îşxalkere narey bi hemkarîya PDKyî verê xo da Başûrî û şarê ma yê Başûrî kerd hedef. Dewleta tirke seba herême her roje hîna zaf bena tehlukeyêk. Dewleta tirke seba plananê xo tim, xo rê hemkaran weye keno. Nê hemkarî Efrîn de Ehrar û Şam, Kobanê de DAÎŞ, Girê Sipî û Serêkanîyê de OSO, Şingal û Başûr de zî PDK yê. PDK hînî bîyo hacetêkê plananê teror û îşxalî yê dewleta tirke. PDK beno sponsorê sûcanê terorî yê dewleta tirke û nê sûcan meşrû mojneno. Ma verî zî bi delîlan eşkera kerd ke dewleta tirke pê destekê PDKyî ameya Başûr, baregehî ronayî, pê çekanê kîmyewîyan hêrişê gerîlayan kerdî. PDKyo ke îxanetê kurdan rê dewam keno, narey zî bîyo sponsorê hêrişê vera Meydanê Teyarayan ê Silêmanî. Pêro kurdî nê hêrişan sey hêrişê vera statuyê Başûrî ercnenê la PDK reyna zî hêrişanê dewleta tirke meşrû vîneno û paştî dano ci.

Eşkera yo ke PDK bîyo hemkarê dewleta tirke û kurdan dewleta tirke rê îxbar keno. PDK herêmanê binê kontrolê xo de destûr nêdano karanê kurdan ê faydeyînan la artêşa tirke her ca de çarneno, lojîstîk dano ci, rayîr ci rê virazeno û dewleta îşxalkere beno heta mewzîyanê gerîlayan. PDKyî heta vizêrî nê kerdişanê xo rê xoverdayîşê têgêrayîşê ma kerdêne bahane. La hêrişê vera Meydanê Teyarayan ra dima eşkerayîya Hukmatê Herêma Kurdîstanî mojnena ke PDK kurdanê ke teslîmê dewleta tirke nêbenê keno hedef û dewleta tirke teşwîq keno.

Ma hêrişo ke dewleta tirke ya faşîste 7ê nîsane de vera Meydanê Teyarayan ê Silêmanî kerdo, bi tûjî şermezar kenê. Ma bi na wesîle hemkarê dewleta tirke PDK zî şermezar kenê. Ma wina fikirîyenê ke sere de kurdê Başûrî pêro şarê Iraqî vera nê hemkaranê îşxalkeran cade tewir bigêrê. Sere de ê şarê Silêmanî, ma pêro tewirê kurdan ê vera nê terorîzmî selam kenê. Ma pê bawer ê ke şarê ma yê Başûrî vera hêzanê kolonyalîstanê îşxalkeran û hemkaranê înan ê xayînan nêrazîbîyayîşê xo bimojno û her şert de wayîrê xeta yewîya neteweyîye vejîyo.

Sere de Koalîsyon ma venga pêro hêzanê mîyanneteweyîyan danê ke vera hêrişanê bêhuqûqîyan û qirkeran ê dewleta tirke tewir bigêrê.''