Şaristanê Dihokî yê Başûrê Kurdîstanî de 17ê nîsane de, şan welatperwer Huseyîn Turelî hêrişêkê çekdarî de amebi qetilkerdene.

Hemserekîya Konseya Rayberdişî ya KCKyî derheqê babete de eşkerayîyêke daye. Eşkerayîye wina ya:

''Huseyîn Turelîyo ke welatperwerêkê êlihijî şinasîyayêne, Dihok de ame qetilkerdene. Xeylêk dezgehan no hêriş bi tûjî şermezar kerd û nêrazîbîyayîşê xo mojna. Agahîyanê nînan ra yeno famkerdene ke Turelî sey xeylêk welatperweranê Vakurî sebebanê sîyasîyan ra şîyo Başûr.

Turelî verî zî Dihok de raştê hêrişêkê çekdarî amebi. Seba ke reya diyîne raştê hêrişî ameyo aseno ke qetilkerdişê ey bira dewleta tirke û MÎTî ya û na bire hetê Parastinî ra ameye paştîdayene. Her çiqas zanîyeno ke Huseyîn Turelî hedefê dewleta tirke û MÎTî de yo zî, tedbîr nêgêrîya û reya dîyîne de o ame qetilkerdene. A raşte PDKyî vera nê hêrişanê dewleta tirke qetî tewir nêmojna û rêxistina Parastinî zî welatperweran kena hedef û înan rê gefan wanena. PDK bi nê hawayî nêzdîyê welatperweranê ke tedayan ra şinê Başûrî, beno û seba ke MÎT înan qetil bikero, paştî dano dewleta tirke. Eke paştdayîşê PDK û Parastinî ra nêbo MÎT nêeşkeno lingê xo bierzo Başûrî û werteyê kamerayanê şaristanan de welatperweran qetil bikero.

PDK teyna kiştişê welatperweran de nê polîtîkayanê qirkerdişê kurdan ê dewleta tirke de zî hemkarîya ci keno. Îşxalê Başûrî û Herêmanê Pawitişî yê Medya de, şerê vera gerîlayan de PDK dewleta tirke reyde têgêreno, Şingal û Mexmûr de paştî dano hêrişan, Efrîn, Serêkanîyê û Girê Sipî de cergan reyde cagêno. Efrîn de demografî vurîyena, kurdî yenê qirkerdene û her roje îşkenceyî vînenê. Atmosferêkê winayênî de PDKyî rê bi nameyê dezgehê xeyrî herêmanê fermîyan abenê. Gelo no senî beno? Bêguman şarê kurdî vîneno ke PDK kam ca de se keno.

PDK Vakurê Kurdîstanî de zî seba ke kontrayê tetîkkêşî yê AKP-MHPyî weçînayîşan de ser bikewê venga şarî dano, înan de pêvînayîşî keno, înan ra wazeno ke paştî bidê AKP-MHPyî û dişmenê kurdan Erdoganî. PDK bi medya û çapemenîya xo destekêkê zelalî dano Erdoganî, her roje kiştoxanê welatperweranê kurdan vejeno televîzyonan. Şarê kurdî yo welatperwer nê kerdişanê PDKyî hol zaneno û teqîb keno.

Ma hêrişê vera Turelîyî şermezar kenê. No hêriş sey ê bînan hetê MÎTî ra, bi destekê Parastinî ameyo kerdene. Bi rayîrê nê hêrişan ê wazenê welatperweranê ma teng bikerê. Şarê Kurdîstanî û dezgehê welatperwerî ganî wayîrê Turelîyî vejîyê û vera nê hêrişkeran û hemkaranê înan bi hawayêkê xurtî nêrazîbîyayîşê xo bimojnê.''