Hemserekîya Konseya Rayberdişî ya KCKyî bi eşkerayîyêle dîyar kerd ke îqtîdarê Armenîstanî Atîlla Çîçek (Leheng) û Huseyîn Yildirim (Alîşêr) teslîmê Tirkîya kerdê û coka hukmatê Paşînyanî şermezar kerd.

Eşkerayîye wina ya:

''Embazê ma Leheng (Atîlla Çîçek) û Alîşêr (Huseyîn Yildirim) hetê dewleta Armenîstanî ra teslîmê dewleta tirke ameyî kerdene. Îdîaya ke vana embazê ma bi operasyonêkî hetê dewleta tirke ra tepişîyayê raşt nîya. Embaz Alîşêr û Leheng teşrîna peyêne ya 2021î de hetê hukmatê Armenîstanî ra tepişîyayî û netîceya îxanetî de teslîmê dewleta tirke ameyî kerdene. Bi rayîrê na xebera zûrayîne xîret dîyeno ke îxanetê hukmatê Armenîstanî bêro nimnayene.

Nê wird şorişgêrê kurdî seba wezîfeyêkê şorişgêrî derbazê Armenîstanî bibî. Wextêk de ke bi destekê dewleta tirke erdê Armenîstanî ameyo îşxalkerdene, zaf manîdar o ke wird şorişgêrî hetê hukmatê Armenîstanî ra teslîmê dewleta tirke ameyî kerdene. Bi nê hewayî eşkera bi ke hukmatê Paşînyanî hemkarîya dewleta tirke ya qirkere û îqtîdarê AKP-MHPyî keno. Nameyê Têgêrayîşê Azadîye yê Kurdîstanî ser o ma hukmatê Paşînyanî şermezar kenê.

Tewirê hukmatê Paşînyanî rexnê û sûcdarîyanê ke derheqê îşxalê Armenîstanî de ci rê yenê kerdene sereraşt keno. Nê prosesê îşxalê erdê xo de Armenîstan herinda ke paştî bido ê kesanê ke vera dewleta tirke têkoşîn kenê, nînan teslîmê Tirkîya keno. Na rewşe heman wextî de vera têkoşînê şarê armenîyan îxanet o. Teslîmkerdişê wird embazanê ma raştîya îxanet û hemkarîya nimite ya hukmatê Paşînyanî vete werte.

Seba ke şarê armenîyan na raştîya hukmatê Paşînyanî fam bikero û seba ke rayaumûmîya demokratîke ney bizana ma na eşkerayîye danê. Teslîmkerdişê wird embazanê ma seba dewleta tirke eşkera keno ke hukmatê Paşînyanî îxanetê dewaya armenîyan û pêro şaran keno, dewleta tirke ya ke qirkera armenîyan a, hemkarîye keno. Ma venga şaran û dostan, bi taybetî zî venga şarê armenîyan danê ke vera nê hukmatê hemkarî wurzê we. Ma pê bawer ê ke şarê armenîyan nê tewirê hewceyî vera hukmatî bimojno û hesabê hemkarî û îxanetî biperso.

Têkoşînê Azadîye yê Kurdîstanî têna seba azadîya şarê kurdî nê, seba azadî û xelisnayîşê şaranê herême bi taybetî zî seba azadîya şarê armenîyan têkoşîn keno. Şarê kurdî bi çimeyê wayûbiratîye ewnîyeno şarê armenîyan ra. Welato ke tede yo sey Welatê Hemparî vîneno û bi nê hîsî nêzdîyê şarê armenîyan beno, paştî dano dewaya şarê armenîyan. Şarê armenîyan zî şarê kurdî bi nê hewayî zaneno û wird şarî bi hîsanê pozîtîfan nêzdîyê yewbînan benê. Hemkarî nêeşkenê zerar bidê têkoşînê wayîbiratîye yê şarê kurd û armenîyan. Eqsê ci nêzdîbîyayîşê winasênî benê sebeb ke şarê kurd û armenîyan hîna nêzdîyê têkoşînî bibê. No tewirê hukmatê Paşînyanî destpêk de zerarêkê pîlî dano dewaya armenîyan û têkoşînê ci yê estbîyayîşî. Cuyêka raştikêne û rûmetêne bi hemkarî nê la bi xoverdayîş û têkoşînî kewena destî. Nameyê Têgêrayîşê Azadîye yê Kurdan ser o ma venga hukmatê Paşînyanî danê ke nê têkilîyanê bi dewleta tirke ra fek vera bido û nê serebûtî ra semed şarê kurd û armenîyan ra uzrê xo biwazo.''