Komîteya Têklîyanê Teberî ya KCKyî derheqê provakasyonanê weçînayîşî de dewleta tirke de eşkerayîyêke daye.

Eşkerayîye wina ya:

''Şarê Tirkîya seba ameyoxê xoo, safhaya peyêne ya weçînayîşî de yo. Weçînayîşê 14ê Gulane seba ameyoxê welatî û herême zaf girîng ê. Ma venga rayaumûmîya Tirkîya, herême û hêzanê mîyanneteweyîyan danê ke vera provakasyonanê dewleta tirke ya faşîste û hukmatê mafya-terorî baldar bibê.

Îqtîdarê AKP-MHPyî yê terorîstî, bi hêrişê vera Meydanê Teyarayan ê Silêmanî mojna her kesî de o do muracatê pêro metodanê gemarinan bikero. Wezîrê Karanê Teberî yê hukmatê mafya-terorî Mevlut Çavuşogluyî ekranan de eşkerayîyê zûrî dayî. Çîyê ke dewleta tiirke derheqê Meydanê Teyarayan ê Silêmanî û derheqê ci de dîyar kerdê, zûr ê. Dewleta tirke têkoşînê hemparî yê YNKyî, QSD û hêzanê Koalîsyonê Mîyanneteweyî yê vera DAÎŞî ra aciz a. 

Serranê peyênan de Silêmanî û dormeyê ci de xeylêk welatperwerî û embazê ma hêrişanê terorê MÎTî de şehîd bîyê. Nê hêrişan de pêro kiştoxî Hewlêrî ra ameyê û şîyê Hewlêrî. Nê hêrişan de hemkarîya MÎT-PARASTINî pê belgeyan îsbat bîya. Hewlêr û Dihok bîyê qerargehê MÎTî. Tewr peyên 17ê nîsane de îna Dihok de welatperwer Huseyîn Turelî qetil kerd. PDKyo ke têgêrayîşê ma keno bahaneya hêrişanê Silêmanî, gelo derheqê nê hêrişî de se vajo ke şaristanê binê îdareyê ci seke bîyê gorê welatperweran. Hema ke gonîya Turelîyî ziwan nêbîya çapemenîya PDKyî seba ke ma bikera mesuldarê hêrişî xîret kena. Ma qetilkerdişê embaz Turelîyî şermezar kenê, keye û şarê ma rê serweşîye wazenê. 

Bi wesîleya nê hêrişî, agahîyê ke ma çimeyanê girîngan ra girewtê zî danê verê çiman û wazenê her kesî vera provakasyonanê dewleta tirke ya faşîste û hukmatê mafya-terorî hişyar bikerê. Dewleta faşîste ya kolonyalîsta ke verê rijîyayîşî û mîyanê tersî de ya seba ke aramîya herême biherimna, dînamîkanê herême têvera bikera wazena Iraq, Sûrîye, Rojawan û Başûr de tqayîş, hêriş û suîkastan bikera û nînan bikera milê têgêrayîşê ma.

Na çarçewe de bi taybetî ganî selahîyetdarê Iraq û Başûrê Kurdîstanî û şarê înan vera kayanê hukmatê teror-mafya yê dewleta tirke hîsger û baldar bibê. 

Îdareyê ma bala xo da agahîyanê ke vanê do dewleta tirke ya kolonyalîste û neyarê kurdî muracatê dek û dolaban bikerê coka bira çalakînêkerdişî weçînayîşan kerdo derg.

Bi serebûtanê peyênan û agahîyanê ke resayê ma, eşkera bîye ke na bira ma çendek raşt a.

Ma venga hukmatê Iraqî, dormeyanê polîtîkan, selahîyetdaranê Başûrî, hêzanê bînan û hêzanê mîyanneteweyîyan danê ke nê warî de bi mesuldarî têbigêrê û tedbîranê hewceyan bigêrê.''