Hemserekîya Konseya Rayberdişî ya KCKyî derheqê weçînayîşanê 14ê gulane de eşkerayîyêke daye. Eşkerayîye wina ya:

''14ê gulane de weçînayîşê wekîlîyan û serekkomarîye ameyî kerdene. Sey têgêrayîşê azadîye yê kurdan bi bawerîya demokratîkbîyayîşê Tirkîya û azadîya Kurdîstanî ma prosesê weçînayîşî pozîtîf dî û na çarçewe de proses ercna. Îqtîdarê AKP-MHPyî prosesê weçînayîşan de zî îmkanê dewlete, metodê teda, zorbazî û şîdetî vistî dewrê û waşt ke îradeyê kurdan û pêro komelî çin bikero. La şarê Kurdîstanî rixmê hende zorbazî û teda îradeyê xo bi xurtî mojna û morê xo da binê serkewtişêkê pîlî.

Şarê ma weçînayîşanê 14ê gulane de vera faşîzmê AKP-MHPyî tewirêko xurt mojna û dersêka tarîxîye daye AKP-MHPyî. Coka ma şarê xo fîraz kenê û selam kenê. Eşkera yo ke seba binvistişê faşîzmî girîngîya Kurdîstanî hetê her kesî ra hol ameya famkerdene û Kurdîstan bi rolêkê tarîxî têgêrayo. 

Weçînayîşê 14ê gulane mîyanê şert û mercanê antîdemokratîkan û tedayan de ame kerdene. Îqtîdarê AKP-MHPyî bi hêzê dewlete her cayê Tirkîya de tedaya komelî zêdînaye ke îradeyê komelî nêaseno. La tewr zaf vera şarê kurdî teda kerde. Prosesê weçînayîşî de AKP-MHPyî bi hezaran merdimî destbend kerdî, tepiştî, îşkenceyê înan kerdî û bi desan welatperwerî zî qetil kerdî. Xora AKP-MHPyî bi dewaya qefilnayîşê HDPyî waşt ke şarê kurdî, hêzê demokratîkî, kedkarî, cinîyî bêalternatîf bimanê. Weçînayîşî binê nê atmosferî de qewimîyayî. Weçînayîşan ra verî bi desan rojnameger, avûkat, sîyasetmedar, hunermend û aktîvîstî Kurdîstan de ameyî destbendkerdene û tepiştene. Rixmê nê kerdişan zî şarê ma tewirê xo ra fek vera nêda û derbêka girane daye faşîzmî ro. Şarê ma destekêko pîl da hêzanê demokrasî û namzedanê demokratîkan û nêverda ke faşîzm Kurdîstan de ser bikewo.

Netîceya ke weçînayîşan de vejîyaya werte seke ameya mojnayene nîya. AKP-MHPyî nê weçînayîşan de zî muracatê hîle, dek û dolaban kerd û netîce vurnaye.Eşkera bi ke xeylêk rayî dizîyayê, pusulayê rayan û lîsteyê rayan vurîyayê. Kurdîstan de bi se hezaran rayî sey betalî hesibîyayî. Netîceyê ke dewlete eşkera kerdê, mojnenê ke îqtîdarê AKP-MHPyî dest nayo îradeyê şaran ser. Faşîzmê AKP-MHPyî kerd ke prosesê weçînayîşan de bi dişmenîya vera kurdan û şovenîzmê nîjadperestîye tesîr bikero. La na polîtîka ser nêkewte. Seba ke şarê kurdî û hêzê demokratîk-şorişgêrî pîya kewtî weçînayîşî faşîzm û nîjadperestîye nêeşkayî ser bikewê.

Bêguman pê nêzdîbîyayîşê hîna hişmendî û karêkê hîna xurtî netîceyê hîna pozîtîfî do bivisîyayêne destî. La girîng o ke no hetê terefan ra bêro ercnayene û netîce tira bêra girewtene. Herinda ke hêzê demokrasî pîya têbigêrê, tay cayan de pêkewtî. No zî ganî sey kêmasîyêke bêro ercnayene. Ma pê bawer ê ke warê sîyasetê demokratîkî û hêzê demokrasî û sosyalîstî yê Tirkîya ney biercnê û netîceyê lazimî tira bigêrê.

Bêguman têkoşînê çareserîya demokratîke ya meseleya kurdan, demokratîkbîyayîşê Tirkîya û azadîya Kurdîstanî do bi xurtî bêro kerdene. Ma pê bawer ê ke nê prosesî de zî şarê kurdî, şarê Tirkîya, cinî, ciwan, karker, kedkar û şorişgêrî bi îtîfaq û yewîyêka xurtêre têkoşîn bikerê. Tirkîya de qetî faşîzm do bin bikewo û Tirkîya do demokratîk biba. Ameyoxê Tirkîya û Kurdîstanî do hetê şaran, hêzanê demokrasî û têkoşînê cinîyan ra bêro dîyarkerdene. Bi na bawerî ma reyna her kesî rê serkewtiş wazenê.''