Hemserekîya Konseya Rayberdişî ya KCKyî bi eşkerayîyêke Gerîlayê Azadîye yê Kurdîstanî yê ke Zap, Metîna, Avaşîn û Xakurkê vera artêşa tirke têkoşînê tarîxî danê, pîroz kerdî.

Eşkerayîye de nê ameyî vatene:

“Gerîlayî derbanê girdan danê dişmenî ro. Dewleta tirke vînîkerdeyanê xo şarî ra nimnena. Menga êlule ra nata gerîlayan xeylêk helîkopterî dayî war. Dişmenî têna îtîraf kerd ke Girê Amedîyê de helîkopterêk dîyayo war. Çunke nêeşkayî nê binimnê. No helîkopter herinda pirodayîşî de digan war û binê kontrolê gerîlayan de mend. Gerîlayan 2 û 3ê êlule de 2 helîkopterê dişmenî dayî war. Embazanê ke nê çalakîyî kerdî, ma înan pîroz kenê û çalakîyanê înan selam kenê.

Hêrişê îşxalî yê dewleta tirke yê vera Başûrê Kurdîstanî tay mendo ke bikewo menga pancêne. Gerîlayê Azadîye yê Kurdîstanî vera hêrişê îşxalî Zap, Metîna û Avaşîn de bi mengan o bi ruhê fedayîyî xover danê û herra Başûrê Kurdîstanî pawenê. Artêşa tirke vera nê xoverdayîşî nêeşkena aver şiro û gerîlayan ra derbeyanê girdan wena.

Gerîlayê Azadîye yê Kurdîstanî derbanê giranan dane artêşa îşxalkere ro û şarê ma û dostanê ma şa kenê. Gerîlayî semedê pawitişê rumetê şarê kurdî û Kurdîstanî bi hewayêkê qehremankîyî şer kenê û xo feda kenê. Şarê kurdî û dostî pê xo xoverdayîşê ke rêçê şehîdan de yeno kerdene, sereberz ê. Xoverdayîşê gerîlayan û şarê kurdî peynîya îqtîdarê AKP-MHPyî arde. Şaro welatperwer ê Kurdîstanî û dostî do têkoşînî xurtêr bikerê û îqtîdarî birijnê.

Ma reyna gerîlayanê HPG û YJA Starî yê ke derbanê giranan danê dişmenî ro û ey bin fînenê, înan pîroz kenê, çalakîyanê înan selam kenê û dewam serkewtişê înan wazenê. Ma şehîdanê xo reyna bi hurmet yad kenê û soz danê ke ma do têkoşînê înan biresnê serkewtişî. Sey tarîxî ewro zî îşxalkerî do vîn bikerê, şar, cinî û hêzê azadîye û demokrasîyî ser bikewê.”