Dewa Cinata ya herêma Omeryanî ya Mêrdînî de 8ê nîsane de gerîlayê HPGyî Musa Kahraman (Xebatkar Bagok) û xalê ci Lokman Gorguno ke babîyê 8 domanan o, rayîrê dewe de ameybî înfazkerdene.

Wezîrê Karanê Zereyî Suleyman Soyluyî îdîa kerdbi ke wirdî zî endamê PKKyî bîyê, coka ameyê qetilkerdene. Wextêkî ra dima eşkera bi ke Lokman Gorgun 52 serre yo, babîyê 8 domanan o û dewe de heywanan weye keno.

Dewijan pare kerd ke herême de eqsê îdîayan pêkewtişêk nêqewimîyayo. Şik est o ke wexto ke Gorgun û Kahraman ameybî têhet, ameyê înfazkerdene.

Merkezê Îrtîbatî û Çapemenîye yê HPGyî 13ê nîsane de eşkerayîyêke daye û vat: ''8ê nîsane de herêma Omeryanî ya Mêrdînî de nêzdîyê dewa Cinara de embazê ma Xebatkar Bagok û welatperwero ercîyaye Lokman Gorgun hêrişê artêşa tirke ya îşxalkere de şehîd bîyî. Artêşa  tirke Gorguno sivîl, bêçek û masûn bêhukmî înfaz kerd û sûcê şerî kerdo.''

Keyeyê Gorgunî bi şikê înfazî muracatê ÎHDyê Mêrdînî kerd. Keyeyî muracatê xo de ard ziwan ke Gorgun wexto ke motorsîklete de siwar bîyêne, raştê hêrişê kesanê nenasan ameyo.

Keyeyî muracatê xo de wina vat: ''Heta nika motorê babîyê ma ameyo mojnayene ma ne zî delîlî. Babîyê ma endamê rêxistinêke nêbii. O babîyê 8 domanan bi û pê zîret û weyekerdişê heywanan bilîyayêne. Ma wina fikirîyenê ke o hetê cendirmeyan ra bi hawayêkê bêhukmî ameyo qetilkerdene.''

Wina pawîyeno ke ÎHD gerreyê cendirmeya bikero û muracatê Serdozgerîya Komare ya Mêrdînî bikero.