Polîsanê Tirkî roja Îneyî Gebze de hêrişê mayanê ke çalakîya roniştişî viraştêne kerdibi û rojêk dima ra zî Qoserê Mêrdînî de hêrişê mayanê ke waştêne tecrîdî protesto bikerê kerdibi.

KJK’yî bi eşkerayîyêka nûştekîye hêrişî bi şidet şermezar kerdî. KJK’yî seba ke roja ewilêne eşkerayî nêdaye hemverê cinîyan ê xoverdayoxan, tepişteyan û şarê Kurdî de xo krîtîk kerd û vat, “Ma do nê hêrişanê bêwijdan û faşîzanan ê polîsanê AKP’yî nêkerê xovîr ra û hesabê ci bipersê.”

Eşkerayîya KJK’yî wina ya:

“Hemleya ma ya ‘Ma tecrîdî bişiknê, faşîzmî birijnê û Kurdistanî azad bikerê’ her wareyî de bena vila û aver şina. Hemrayê ma û embazê ma yê tepişteyê azadîye yê ke grevê înan se rojî ra ravêrto xeylî reyan ard ziwan ke heta Rayber Abdullah Ocalan nêreso şertanê azad û yê xebate ê do xoverdayîşê xo bidomnê. 

Ma Do Çi Rey Xovîr ra Nêkerê

Na mana de sere de cinîyan ser o, hemeyê şarê ma ser o mesuldarîya berzkerdişê mucadeleyê hemverê tecrîdî yo ke bi serkêşîya Leyla Guvene dest pêkerd esta. Mayê ma yê ke her şertanê zehmetan de wayîrê nê mucadeleyî vejênê rastê hêrişê polîsanê AKP’yî yê faşîstan ameyî. Seba ke ma roja ewilêne yê hêrişan de nêeşkayî hemverê n3e hêrişan de eşkerayî bidê ma sere de mayanê xo, heme cinîyan ê xoverdayoxan, tepişteyan û şarê xo rê xokrîtîkkerdişê xo anê ziwan.

Mayê ma yê ke bê maçkerdişê destê înan yan zî helalwaştişî destê ma nêşino înan, ma do heme hesabê hêrişanê ke înan ser o ameyê kerdene bipersê, mayanê xo tena nêverdê. No mesuldarîye sere de yê cinîyan ê Kurdan yê cinîyan ê Tirkîyayijan û ciwanan a zî. Cinî û ciwanê ke hurmetê înan seba mayanê bianor û demokratan de esto ganî bêreaksîyon memanê.

Ganî her polîsê AKP’yî yo faşîst yo ke bi copan tehne dano, erd ra kaş keno, awe erzeno û hêriş keno bizano ke çîyê ke ê kenê do nêrê qebûlkerdene û do hesabê ci bêro persayene.

Bi Tersê Vînîbîyayîşî Hêriş

Mayê ma paştî danê waştişanê domananê xo yê ke heqanê xo yê merdimîye û xozayîyan wazenê. Ganî îqtîdarê AKP’yî yo ke mayanê ma ra terseno bizano ke binkewtişê ci rê û vînîkerdişê ci rê zaf tay mend. Ganî her kes bizano ke no desto ke bi tersê vînîbîyayîşî hemverê mayanê ma de bîyo berz rew ra destêko şikîyaye yo.

AKP Dişmenê Azadîye yo

Zaf eşkera yo ke îtîdarê AKP-MHP’yî yo faşîst seba ke hemverê averşîyayîşê hemleya ma ya azadîye û xoverdayîşî de kewto halêkê zorî mîyan muracatê hêrişan keno, bin ê hawayî wazeno ke xoverdayîşê ma bişikno û veng a vejo. AKP dişmenê Kurdan o. AKP dişmenê azadîye yo. Labelê ma zulm û kayanê faşîzmî zaf rind nas kenê û bi înan zanê. Naye ra ma do hemverê hêrişan de teslîm nêbê û heta dêsê Îmraliyî perçe bibê û Rayber Apo bireso azadîye û şertanê xebate yê azadan ma do çalakîyanê xo bi xurtî bidomnê. Heme şarê ma, cinî, ciwanî, dostê ma û rayapêroyîye ganî na rastîye wina bizano. Ma do nê hêrişanê faşîzaneyan mekerê xovîr ra û hesabê ci bipersê. Tewirê mayanê ma tewirê Leyla Guvene yo. Do hemleya ma ya xoverdayîşî tecrîdî bişikno faşîzmî birijno û Kurdistanî azad bikero û Tirkîya bikero demokratîke.”