Vakurê Kurdîstanî de hêrişê vera banê HDPyî yê Bahçelîevlerî ame şermezarkerdene û mesajê pîlkerdişê têkoşînî ameyî dayene.

Rêxistina HDPyî ya Amedî Meydanê Dagkapiyî de şekrayîye daye. Îdarekarê HDPyî yê Amedî, aktîvîstê TJA, Dayîkê Haştîye û xeylêk temsîlkarê rexistinanê komelî sîvîlî tewrê çalakîye bîyî.

Hemsereka HDPyî ya Amedî Guîlstane Atasoy vat: ''Vizêr qirkerdişêko gird ame vergirewtene. Ma Îzmîr de zî dî ke nê qirkerdişî pê rayîr ramojnayîşî yenê kerdene. Vizêrna hema îdarekaranê welatî eşkerayîyêke nêdaye. Kenê ke nê hêirşan bikerê normal. Seba ke HDP şarî temsîl keno û vera şerî haştîye wazeno yeno hedefgirewtene. Şima se kenê bikerê ma do tim wayîrê mîrasê têkoşînî vejîyê û sereberz payra bê.''

Hemsereka HDPyî yê Amedî Zeyyat Ceylanî zî vat: ''Ê seke wa bikerê ma do cewabêkê xurtî bidê faşîzmê înan û hêrişan pûç vejê. Ma qirkerdişê bînî zî xo vîr a nêkerdî û qetilkaran zî zanê. Qetilkarî do rojêke bêrê muhakemekerdene. Îqtîdarê AKP-MHPyî gama ke keweno tengayî hêrişê kurdan keno. La peynî ra tewr peynî ê do bin bikewê û têkoşînê şarî ser bikewo.''

Dêrsim de hetê Platformê Kede û Demokrasîyî ra Kuçeyê Sanatî de eşkerayîye ameye dayene. Wekîlê HDPyî yê Dêrsimî Alîcan Onlu zî tewrê çalakîye bi.

Onluyî vat: ''No hêriş merkezî ra yeno kerdene. Netîceya polîtîkaya Qesre ya ke şaran cêser fînena û kena dişmenê yewbînan de nê hêrişî yenê kerdene. Medyaya çamurî zî propagandaya ci kena. Xora hetê bînî ra seba ke hêrişîkarî merê cezakerdene linga hukmî zî yena raameyene. Pê hêrişê vera partîya ma wazenê heme waranê demokratîkan çîn bikerê. Ma do pê têkoşînê hemparî û îtîfaqê demokrasîyî cewabê nê hêrişan bidê.''

Serekê EMEPî yê Bajarî Ergîn Tekînî zî ard ziwan ke pê hêrişê vera HDPyî wazenê hêzanê demokrasîyî bitersnê û vat îqîtdaro ke peynîya ci bîya nêzdî keno ke pê kaosî payra bimano.

Qezaya Kanîreşî ya Çewlîgî de zî bi çalakîyêke hêrişê vera HDPyî ameyî şermezarkerdene û semedê têkoşînê hemparî ame vengdayene. Reyna Êlih,Sêrt, Şirnex, Riha, Wan, Colemêrg, Agîrî û bajaranê bînan de zî hêrişê vera HDPyî ameyî şermezarkerdene û mesajê wayrîvejîyayîşê HDPyî û pîlkerdişê têkoşînî ameyî dayene.