Bajarê Hewlêrî yê Başûrê Kurdistanî de 17’ê Temmuze de restoranêkê bi nameyê Huqqabazî yê  Empire City de wezîfedarê Serkonsolosxaneyê Tirkî yê Hewlêrî Osman Kose û di kesî ameybî kiştene.

Derheqê qewimîyayîşî de kesê bi nameyê Mazlûm Dogan, Mûhammed Beşîksîz ê ke Vakurê Kurdistanî ra yê û yewna kes ameyî destbendkerdene. Ame vatene seba ke Dag, Beşîksîz û keso hîrêyin îfadeyo ke verî ra ameyo amadekerdene îmza bikerê înan rê îşkence yeno kerdene. Goreyê hayîdarîyan Kose mesuldarê Masaya Îranî yê MÎT’î bi û dima ra Masaya Başûrê Kurdistanî de ame wezîfedarkerdene. Yeno vatene, heyetêkê MÎT’î ke hetkarê musteşarê MÎT’î Hakan Fîdan zî tede yo pîya bi endamanê ‘Parastin’î Dag û Beşîksîzî rê îşkence kerdo.

Pîya Îşkence Kerd

Endamêkê Asayîşî ke nêwaşt nameyê xo eşkera bikero, vat ke kenê ke Kose sey wezîfedarêko alelade bêro ramotene, labelê o mesuldarê Masaya Başûrê Kurdistanî ya MÎT’î bi. Endamê Asayîşî vat îşkenceyêko giran Dag, Beşîksîz û keso ke înan dir ameyo destbendkerdene rê ameyo kerdene û vat, MÎT û ‘Parastin’î pîya cipersayîş kerd. Heman çimeyî pêhesna yeno waştene ke bi rayîrê îşkenceyî îfadeyo ke verê nikayî ameyo amadekerdene bidê îmzakerdene û vat Dagî û kesê ke ê dir ê heta nika sûcdarîyê ke înan rê yenê kerdene qebul nêkerdê.

Rixmo ke restoranê bi nameyê Huqqabazî yo ke qewimîyayîş tede virazîya û dorê ci de xeylî kamerayî estê, balkêş o ke heta nika dîmenêkê Dag û Beşîksîzî çinê. Heta nika tena dîmenêkê Dagî yo nêbewlî ameyo weşanayene ke o zî bewlî nêyo kamca ameyo antene. Komêka 18 kesan a MÎT’î ke hetkarê Hakan Fîdanî zî tede yo û tîmê taybetî yê Tirkî seba cipersayîşê qewimîyayîşî Hewlêr kerdo sey bargehêkê Tirkî. Efserê Tirkî xeylî mehla û kuçeyanê Hewlêrî de bi kincanê Pêşmerge û Asayîşê Hewlêrî kontrolan kenê.