Endamê Kongreya Îslamî ya Demokratîke (CÎK) Mala Yusuf Andanî seba ke hesasîyetê dînî yê komelî ser o sîyaset kenê, Erdogan û AKP rexne kerd.

Mala Andanî ANFyî rê qisey kerd û pare kerd ke Îslam bi se serran o Tirkîya û Rojhelatê Mîyanênî de sey malzemeya sîyasetî şuxilîyeno. Mala Andanî vat: ''Nê bazirgananê dînî Îslam bê misilmanan verdayo. Înan Quran-i Kerîm xo rê kerdo tirs. Seba hesabanê xo ê dînî şuxilnenê.''

Mala Andanî bale ante ser ke namzetê serekkomarîye yê Îtîfaqê Miletî Kemal Kiliçdarogluyî seba ke pay nabi sejdeyî ser amebi rexnekerdene û vat: ''Seba misilmanan her ca sejde yo, heta herra pake zî bena sejde. Cambazanê dînî çîyê sey sejdeyî xo rê kerdê malzeme. Şar nê babetan de zaf zaneye nîyo. Eke ma merdimî nînan ser o hişmend bikerdêne ewro ma no çi nîqaş nêkerdêne.''

Mala Andanî ard ziwan ke ê kesê ke verê edalet, heqan û huqûqî de hûrmetkar nîyê nêbenê alîm û dîndarî. Andanî vat: ''Ebû Cehîl zî alîmêkê dînî bi la vera edaletî bi. Ewro zî Ebû Cehîlî zaf ê. Nê kesî seba ke îqtîdarê xo bipawê merdiman rê zulm kenê.''