Fermandaranê Qerargehê Merkezê Pawitişê Şarî (MPŞ) ra Amed Malazgîrtî bernameyê taybetî yê Stêrk TVyî de qisey kerd û şerê Herêmanê Pawitişî yê Medya ercna.

Qiseykerdişê Malazgîrtî ra tay noqtayê girîngî wina yê:

''Dewleta tirke armanc kena ke pêro Başûrî çarçewa xeyalê caardişê Mîsak-i Mîllî de îşxal bikera. La xoverdayîşê gerîlayan şar de hêvîyêke afernaye. Dewleta tirke zî dî ke nêeşkena PKKyo ke na aste de şer keno, bin bivisna. Coka kena ke qelsîyanê xo yê şerî pê propaganda biqefilna. Ê tim vanê ma PKKyî qedînenê. 2017 de Suleyman Soyluyî vatêne ke 'hînî çew do vengê PKKyî nêeşnawo.' La ê wextî ra nata ê hertim qala PKKyî kenê. Dewleta tirke vera gerîlayan çekanê kîmyewîyan şuxilnena, sûcê şerî kena. Reyna zî PKK çarçewa qanûnanê şerî de têkoşîn keno. Erdoganî verî kam de şer kerdêne nika o tede pêkeno. Çunke Erdogan nê şerî de zorî vîneno. Dewleta tirke seba ke kurdan qir bikera, destkewteyanê kurdan çin bikera û pêro zengînîyanê kurdan bivisna destî her çî kena.

Dewleta tirke 24ê nîsane ra nata hêrişan kena. Dewleta tirke vatêne qey wextêkê kilmî de do ser bikewa la wina nêbi. Raşt o; dişmen sey Werxelê tay cayan de kewto erazî la nê cayan de embazê ma zî est ê.

Dişmeno ke vera şerê tunelan bin kewto wazeno pê kepçe û dozeran tunelan biqefilno la nêeşkeno. Dişmen nê cayan de gaz û çeka kîmyewîye şuxilneno, verê tunelan de lastîkan vêşneno, leşkeran şaweno. Xeylêk leşkerî tîya de kişîyayî, coka narey dişmenî qoricîyî ardî. Dima ke tay qoricîyî kişîyayî hînî ê zî nênê. Ma eşnawit ke înan qoricîyan rê teklîf kerd ke eke şorê tunelan 6 mengan îzîn bêro dayene înan û meaşê înan zî do bêro dayene. Yanî leşker û hêzê taybetî yê dewlete tersî ra nêeşkenê şer bikerê.

Heftanîn de dişmenî merdimê ke pîknîkî kerdêne pê obusan kiştî û dima zî vat 'PKKyî kerdo.' La obusê PKKyî est ê? Goreyê Erdoganî pêro kurdan cara terorîst ê. La terorîsto tewr pîl dewleta tirke bi xo ya. Dewleta tirke do peynî de biba belaya sereyê NATOyî zî. Dewleta tirke seba ke kurdan qetil bikera ge nêzdîyê Rûsya bena ge zî nêzdîyê NATOyî bena. Ganî Erdoganî ra hesab bipersîyo. Dewleta tirke erdê kurdan îşxal kena û kurdan rê zulm kena. Ganî qirkerdişê dewleta tirke bêrê belgekerdene û pêşkêşê dinya bêrê kerdene.

Gerîlayî bedelanê pîlan danê, bi roja vêşan û têşan têkoşîn kenê la reyna zî apey gamêke nêerzenê, têkoşînî rê dewam kenê. Embazê ma xeta PKK û Rayber Apoyî de şer kenê. PKK nê prosesê krîtîkî de çi keweno milî keno. Embazê ma yê ercîyayeyî nê şerî de şehîd bîyî. 40 serrî yo nê şerê pîlî de ma bedelan danê û beno ke ma do bidê. Heta ke azadîya Kurdîstanî û Rayber Apoyî bêrê caardene ma do xover bidê.

Ciwanî eşkenê nê prosesî de dest bierzê çeke û metropolan de çalakîyan bikerê. Pêro selahîyetdarê dewlete hedefê ciwanan bibê. Ciwanî wa pabeyê fermanan û talîmatan mebê. Ganî no şer vilayê pêro Kurdîstanî bibo.

Dewleta tirke seba ke destkewteyanê Rojawanî çin bikera nêzdîyê Esadî zî bena. Dewleta tirke vana do multecîyanê Sûrîye bierşawa erdê Rojawanî. Dewleta tirke kena ke cerganê xo Rojawan de ca bikera.

Nika warê Şikefta Birîndaran û Karkerî de şerêko çetin est o. Reyna rojawanê Zapî Girê Amedîyê û Girê Cûdîyî de şer bîyo xorin. Şer rojanê verê ma de do bibo çetinêr. Ganî nê prosesî de şarê ma zî sûcanê dewleta tirle teşhîr bikero. Ganî ma zî mîyanê xo de asta şerî biercnê, şerê tîmanê hereketînan û tunelan biercnê. Taktîk û terzê xo tay bivurnê.

Ez Hemleya 15ê Tebaxe şexsê Fermandar Egîdî de fîraz kena. Embazanê şehîdan şexsê Erdal, Cesur Çelê, Ekin Serhat, Tirêj Dijwarî de yad kena. Ma soz danê ke do bibê layîqê şehîdan.''