Fermandarîya Qerargehê Merkezê Pawitişî yê Şarî (MPŞ) derheqê  Hewteya Qehremanîye de beyanatêk da û vat ke Egîdî do rayîrşîyayîşê serkewtişî de biciwîyê.’’

Beyanatê MPŞ’yî de wina ame vatene:

“Cuya azade, seba şaran rastîye û anoro tewr pîle ya û her şar wazeno ke cuya azade de biciwîyo. Şaranê ke azadîya xo girewta xo dest û ewro rîyê erdî de xoser ciwîyenê, saya qehremananê xo de bîyê wayîrê anorî. Qehremanîye, seba azadîya yew şarî, yew welatî zaf muhîme ya û qehremanan seba şarê xo, seba welatê xo bi qerardarîye xetereyî dîyê û verê zulm û zordarîye de bi coşêko pîl wariştê payan ser, mucadele kerdo berz û bi no qeyde kelecanîye û motivasyon viraşto. Naye ra zî tarîxê azadîya şaran de cayê qehremanan cîya û berz o.

Mucadeleyê xoverdayîşê PKK’yî de zî hewteyê qehremanîye xoverdayîşî, wariştişî, azadîye tarif keno. Şarê ma xoverdayîşê Mazlûm Doganî yê 21’ê Adare ra heta şehîtkewtişê Mahsum Korkmazî yê 28’ê Adare xo rê sey Hewteya Qehremanîye dîya û mabênê nê tarîxan de şexsê nê her di şehîdan de pêro şehîd û qehremananê xo bi hurmet yad keno.

Embaz Egîd ‘Qehremano Neteweyî yê Şarî yo” û ey bi xoverdayîş û vindertişê xo  tesîr dayo şarî û warizno payan ser. Embaz Egîdî serkêşîya gerîlatîye kerda û şertanê zor û zehmetinan de gama verêne eşta û bi no qeyde tarîxê xoverdayîşê şarê xo de nameyê xo dayo nuştene.

Embaz Egîd mimar û fermandarê 15’ê Tebaxe yo û bi dîsîplînê xêza Rayber Apoyî, bi cesaret û qerardarîye, pêroyê Kurdistanî de tesîrêko pîl viraşto. Ewro bi ruhê ambaz Egîdî derbeyê pîlî dîyê DAÎŞ^ê barbarî û seba pêroyê dinyaye gamêka pîle ameya eştene. Ruhê  embaz Egîdî temînatê azadîye yo û Egîd her daîm hetê şarê ma ra bêro yadkerdene.

Partîya ma PKK, bi rayberîya Serek Apoyî seba ameyeyê bi anor û azadî mucadele kena. Partîya ma her şehadet açarnayo bi yew hamleya neweye û bi keda şehîdan resta asta serkewtişî. PKK’yî şehadete embaz Egîdî ra dima bingehê leşkerîya gerilla eşt ci û gerîlatîye ewro bîya estbîyayîşê şarê Kurdî. Kurdî koyan de, deştan de, bajaran de, zindanan de xo ver danê û ruhê Egîdan û Zîlanan do şarê Kurdî biresno serkewtiş û azadîye.

Rejîmê AKP-MHP’yî yo faşist  çend serrî yo ke bi tecrîd şono Rayberê Şarê Kurdî Abdullah Ocalanî ser û ewro bi serkêşîya Leyla Guvene yew hamleye ameya destpêkerdene. Na hamleye şexsê Ugur Şakarî, Zulkuf Gezen, Ayten Beçete, Zehra Saglame û Medya Çinare de qehremanê xo afernayê û Hewteyê Qehremanîye yê 2019’î de mîjdanîya serkewtişî dana. Egîdî do rayîşrîyayîşê azadîye de biciwîyê. Ma şexsê Fermandar Egîdî de, pêroyê şehîdan bi hurmet yad kenê. Ma soz danê ke xêze û qerardarîya înan do ma rê bibo qilawiz û ma do xeyalanê înan bîyarê ca. Ma Hewteyê Qehremanîye yê pêro embazan û şarê xo pîroz kenê. Egîdî do rayîrşîyayîşê serkewtişî de biciwîyê.’’