Kampa Multecîyan a Şehîd Rustem Cûdîyî (Mexmûr) de  warê weşîye keno ke heme şartan de xizmetê weşîye bido şarî.  Nê nêweşxaneyan ra yew yê Şehîd Hogirî yo ke 2018 de ame ronayene. Bexdad, Kerkuk û Tikritî ra zî şar yeno Nêweşxaneyê Şehîd Hogirî. Nêweşxane de 22 xebatkarê weşîye est ê. Înan ra yew zî Dr. Mihemed Unver o.

Dr. Mihemed Unverî vist vîrî ke Komîteya Weşîye pabesteya Meclîsê Şarê Demokratîkî yê Mexmûrî yo û vat: “Nêweşxaneyê ma roje de 19 saetî xizmet dano. Dormeyê Mexmûrî ra zî nêweşî yenê . Nêweşxaneyê ma 4 serrî yo xizmet dano la seke yeno zanayene vera Mexmûrî ambargo est o. Seba ke rayîrî girewteyê ma nêeşkenê nêweşan sewqê nêweşxaneyanê bînan bikerê. Hetê dermanî ra ma tengayî ancenê. Rixmê heme probleman ma nêweşanê xo tedawî kenê û şar xizmetê ma ra razî yo. Seba ke doktorê pîsporî kêm ê, ma nêeşkenê tay nêweşîyan tedawî bikerê la semedê nêweşan çîyo ke destê ma ra yeno ma kenê. Sîstemo kapîtalîst weşîye sey tîcaretî geno dest. Ge ge semedê pereyî tedawîya ke hewce nêkena zî kenê. Ma de mantikê karî çîn o, mantikê xizmetî est o. Heta ke hewce mekerê ma derman nêdanê nêweşanê xo. Rîyê ambargoyî ra ma tengayîye de yê. Nêweşê giranî nêeşkenê kampe ra vejîyê. PDK destûr nêdano. Ma pê şertanê xo derman peyda kenê la ne PDK ne zî hukmatê Iraqî destûr danê ke dermanî kampe ra ravêrê.’’

Nêwşxaneyê Fîzyoterapî yê Şehîde Vîyane zî 2003 de ame ronayene. Rixmo ke nêweşxane de têna di doktorî est ê, xizmetê weşîye dîyeno şarê Mexmûrî. Nê doktoran ra yew Dr. Tîrêj Demîr o. Demîrî vat:“Ma pê paştdayîşê dostan û hetkarî merkezê weşîye aver berd. Merdime ke teberî ra ameyî û tay nêweşê ma yê ke bîyî weş ma rê ekîpmanê ke hewce kenê, dîyarî kerdî. Seba ke nêweşê ma rîyê ambargoyî ra nêeşkenê bêrê sewqkerdene zaf zehmetîye ancenê. Malzemeyanê nêweşxaneyî de prblem est ê. Tay cîhazê ke xeripyenê ma  bi xo tehmîr kenê.’’

Nêweşan ra Qumrî Yaman zî ard ziwan ke  3 aşmî yo nêweşxane de tedawî vînena û vat rixmo ke nêweşî zaf ê û îmkanî tay ê xizmetê weşîye yeno dayene û xebatkarê weşîye înan rê zaf eleqedar ê.