HDPyî bi wesîleya 1ê Êlule Roja Haştîye ya Dinya bi şîarê 'Vera şerî û mergî ma cuye pawenê' Parka Musa Anterî de mîtîngêk kerd. Meydanê mîtîngî de pankartê sey 'Tecrîd vindarnê, haştîye ser o qisey bikerê', 'Şer merg o, haştîye cu ya. Haştîye bipawê' ameyî daliqnayene.

Cinîyan pê kortejan, slogan û tîlîlîyan meydan de cayê xo girewt. Cinîyan fotografê Aysele Tugluk kirişt û laçikê sipîyî dayî xo rê. Çalakîkerê Nobeta Azadîye zî tewrê mîtîngî bîyî. Girseyan meydan de pê sloganê 'Bê Serek Cuye Nêbena' azadîya Rayberê Şarê Kurdî Abdullah Ocalanî waşte.

Mîtîng de verî Hemsereka DBPyî ya Wanî Gulderene Varli û Hemserekê HDPyî yê Wanî Fîkret Doganî qisey kerd. Înan ard ziwan ke haştîye pê têkoşînê înan do bêra.

Dima Koma Sorjiyan vejîyaye sehne ser.

Mîtîng de Hemsereka Pêroyîye ya HDPyî Pervîne Buldan qisey kerd. Buldane ard ziwan ke tercîhê şaran haştîye yo la tercîhê îqtîdarî şer o. Buldane dima bale ante tecrîdê Îmraliyî ser û vat: ''Prosesê çareserîye de Birêz Ocalan aktorê haştîye bi. La dima dewlete pêro rayîrî pê tecrîdî qefilnayî. Ewro tecrîd bîyo sîstemêkê îdareyî. Nê sîstemê tecrîdî ra ewro welat mîyanê krîzî de yo. Seba ke welat krîzan û şerî ra bixeliso tek rayîr wedaritişê tecrîdî yo. Îqtîdar zî zaneno do bin bikewo coka verê xo dano dişmenîya kurdan. La ma zanenê ke pê dekewtişê erdê Sûrîye haştîye nêna. La şarî do destûr nêdê konseptê şerî yê îqtîdarî.''

Buldane vist vîrî ke cenazaya Hakan Arslanî zereyê yew tewre de dîyaya keyeyê ci û vat: ''Seba ke zîndanan de bi hezaran kurdî est ê, tepişteyê nêweşî vera nêdîyenê, Aysele Tugluk rê neheqîye yena kerdene, cenazayî zereyê tewre de dîyenê ê do bin bikewê. 90an de kurdî dîyenê vînîkerdene la nika cenazayê kurdan pê kargoyî yan zî zereyê tewreyî de yenê dayene. Şima do na bêwijdanî û dîrîtîye ra vînî bikerê. La kurdî sindoqan de do şima ra hesab bipersê. HDP seba şarê xo sîyasetê demokrasî keno û do bikero.

Ma Îtîfaqê Kede û Demokrasî û îtîfaqê Kurdîstanî reyde bi xurtêrî do ser bikewê. HDP do bibo vengê şaran. HDP temînatê cuye û haştîye yo.''

Qiseykerdişê Buldane ra dima Azad Bedran vejîya sehne ser û mîtîng qedîya.

Anqara de zî Hêzanê Demokrasî û Kede bi şîarê 'Emperyalîzm do bin bikewo, şarî do ser bikewê' mîtîngêk kerd. Wekîlê HDPyî Fîlîze Kerestecîoglu û Mehmet Ruştu Tîryakî zî tede xeylêk temsîlkarê dezgeh û rêxistinan tewrê mîtîngî bîyî. Mîtîng de eşkerayîya hempare ameye wendene. Eşkerayîye de ame parekerdene ke îqtîdarê Tirkîya dişmenîya kurdan keno, vera kurdan polîtîkaya înkar û îmhayî ano ca. Eşkerayîye de bale ameye ante hêrişanê vera Başûr û rojawanî û ame vatene ke îqtîdar seba menfaetanê xo qirkerdiş keno. Eşkerayîye de venga her kesî ame dayene ke seba caardişê haştîye yew bibo. Mîtîng de Koma Gazele vejîyaye sehne ser.