Fermandarîya Qerargehê Merkezê Pawitişê Şarî (MPŞ) derheqê şehadetê Fazil Botanî de eşkerayîye daye û nê pare kerdî:

''Hemrayê ma Fazil (Ahmet Şeker) yo ke Têkoşînê Azadîye yê Kurdîstanî de rolê ci yo gird est o, şehîd bîyo. Ma sere de keyeyê erjîyayeyî yê hemra Fazilî rê, şarê Botanî, şarê welatpwerwerî yê Kurdîstanî û hemrayanê xo rê serweşîye wazenê. Ma şexsê hemra Fazilî de heme şehîdanê xo bihurmet û mînetî yad kenê.

Hemra Fazilî erjê welatperwerîye yê şarê Botanî û îdeolojîya Apoyî resnayê pê û bi qehremanêkê şarî.  Bi şervanîye dest pêkerd û pede pede mîyanê pratîkê şerî de xo resna, tecrubeyî kerdî pêser û bi fermandarêkê ARGKyî. Bi seyan hemrayanê xo rê serkêşîye kerde bû fermandarêko efsane yê Botanî. Xeylêk debeyê girdî dayî dişmenî ro, dişmenî ser ra wedartişê çekan kerd sey tradîsyonî û îradeyê xo dişmenî rê da qebulkerdene. Xeylêk waranê Botanî de berpirsîyarîya girde girewt, zaf çalakîyî plan kerdî  û bi xo mîyan de ca girewt. Sey hemra Kemal Pîrî xoverdayox bi û tim tewr vernî de tewrê têkoşîn û xebatan bîyênî. Sey fermandar Egîdî bicesaretê girdî şiyênî dişmenî ser û bi ruhê qesasî derba mergî dayêne piro.

Hemra Fazilî pîya bi tecrubeyê xo perwerdeyê Rayber Apoyî girewt. Apoyîyêko heqîqî bi ke bi  vindertiş û cuya xo zanayêne ke senî xîtabê zerrîya merdiman  bikero û înan qezenc bikero. Hemra Fazil senî ke fermandarêko efsane yê ARGKyî bi, gerîlatîya dewrê neweyî yê HPGyî rê zî serkêşîye kerde. semedê averberdişê Hemleya 1ê Hezîran a2004î  Heftanînî ra ravîyert Botanî, serkêşîye kerde û dima ra 2005 de ravîyart herêma Colemêrgî û hemle kirişte merhaleya neweyî. Xebatanê tunalenê şerî de zî rolê ey gird o. Mîmar û fermandarê serewktişê Zapî yê 2008î yo. Bi xo Şikefta Birîndara de cewabo gird da hêrişê dişmenî, hareketê dişmenî betal kerd û derbaya tarîxî artêşa tirke ro ke do çirey xo vîra mekero.

Sey fermandarêkê Kurdîstanî hemra Fazilî  têkoşînê Rojawanî de zî cayê xo girewt. Hemra Fazilî Botanî ra heta Zagrosan, Qendîlî ra heta Heftanînî çar parçeyanê Kurdîstanî de berpirsîyarîya girde girewt û heme wezîfeyê xo bi serkewtişî ardî ca. Xeylêk şerî koordîne kerdî, bi seyan şervan û fermandarî perwerde kerdî. Emrê ci yê 54 serran ra 34 serrî pê têkoşînî ravîyartî. Ma sey hemrayanê ci soz danê ke ma do tim ey teqîp bikerê, gerîlatîya serkewtişî bikerê heqîqet û waştişê şehîdan bîyarê ca.''