Fermandarîya Qerargehê Merkezê Pawitişê Şarî (MPŞ) bi wesîleya serrgêra 19. ya Hemleya 1ê Hezîrane eşkerayîyêka nuştekîye daye.

Eşkerayîye wina ya:

''Vera Komployê Mîyanneteweyî yê serê Rayber Apoyî serkêşîya gerîlayan de Hemleya 1ê Hezîrane dîyabî destpêkerdene. Ma serrgêra 19. ya Hemleya 1ê Hezîrane Rayber Apoyî, keyeyanê şehîdan, şarê ma yê welatperwerî, dostanê xo û hemrayanê xo rê fîraz kenê. Ma pêro şehîdanê xo yê qehremanan şexsê embazan Erdal, Adil, Nûda, Delal Amed, Atakan Mahîr, Kasim Engîn, Fazil Botan, Egîd Civyan, Gulçiya Gabar, Cûmalî Çorûm, Mizgîn Ronahî, Yaşar Botan û Leyla Amedan de yad kenê û soz danê ke ma do têkoşînê azadîye yê şarê Kurdîstanî biresnê serkewtişî û şehîdanê xo tim yad bikerê.

Seke zanîyeno dewleta tirke 1999 de dişmenîya xo ya vera Rayber Apoyî risnaye leweyî û waşt ke netîceyêke tira bigêra. La tewirê Rayber Apoyî yê raştikênî Komployo Mîyanneteweyî pûç kerd û berê çareserîya meseleya kurdan serê bingeyê demokratîkî de akerd. Nê esasî ser o ma venga pêro gerîlayan da ke şerê çekdarî vindarnê û sînoranê Tirkîya ra vejîyê. Mabênê 1999-2004î de rixmê nê tewirê Rayberê ma û têgêrayîşê ma zî dewleta tirke gamêke nêeşte, polîtîkaya rijnayîşê têgêrayîşê ma xo rê kerde esas. Hukmatê AKPyî vera têgêrayîşê ma konseptê tasfîye û çinkerdişî da destpêkerdene. Coka vera têgêrayîşê ma rayîrêko bîn nêmend ke Hemleya 1ê Hezîrane bido destpêkerdene. Nê esasî ser o Hemleya 1ê Hezîrane vera konseptê 'ya teslîmîyet yan zî îmha' vejîyaye werte.

Hemleya 1ê Hezîrana 2004î sey Hemleya 15ê Tebaxe têkoşînê pawitişê estbîyayîşê şarê Kurdîstanî de rol kay kerd. Prosesê neweyî yê Hemleya 1ê Hezîrane vera prosesê îmha yê dewleta tirke û hêzanê komplogeran cewabêko xurt da. Ruhê 1ê Hezîrane serê esasê paştdayîşê têkoşînê gerîlayan de û şaristanan de tewirê şarê kurdî de dewleta tirke pratîk de arde serê masa. Adirbirnayîşan de zî, dîyaloganê sey Oslo û Îmraliyî de zî, nîqaşanê serê meseleya kurdan de zî rolê Hemleya 1ê Hezîrane est o. 

Bêguman averşîyayîşê na hemle de çimeyo esas paradîgmaya Modernîteya Demokratîke ya Rayber Apoyî û têkoşînê gerîlayan o. Wextê prosesê Hemleya 1ê Hezîrane de gerîlayê azadîye yê Kurdîstanî zî xo mîyan de kewtî prosesêkê hemle. Nê prosesî de gerîlatîya modernîteya demokratîke ameye afernayene, perspektîfo newe vejîya werte. Gerîlayê azadîye ewro teyna sey gerîlayanê klasîkan serê erdî de şer nêkenê, binê erdî û hewa de zî asta şer kenê.

Gerîlayanê azadîye rixmê zor û zehmetîyan zî 39 serran bi hawayêkê destanwarî xo ver da, bi waştiş û qerardarî hêrişê dişmenî pûç kerdî. Bi taybetî 8 serranê peyênan ê rejîmê AKP-MHP-Ergenekonî de bi taktîkê şerê tunelan û şerê tîmanê pisporan gerîlayan performansêko pîl aferna û mojna ke gerîlayê azadîye qetî bin nêkewê. Ewro zî gerîlayî amade yê ke serê rayîrê azadîya şarê ma û Rayberê ma de pêro wezîfeyanê xo bîyarê ca.

Nê esasî ser o ma serrgêra 19. ya Hemleya 1ê Hezîrane reyna şarê ma, dostanê ma, embazanê ma, şerwananê azadîye û Rayber Apoyî rê fîraz kenê û înan rê serkewtiş wazenê.''