Namzetê Partîya Çep a Keske herêma Serhedî de bi coşêkê pîlî ameyî pêşwazîkerdene. Erdexanî ra heta Wanî sozê serkewtişî ameyî dibakerdene.

Qezaya Rêya Armûşî ya Wanî de salonêka dawetî de bi seyan kesî ameyî pêser. Tîya de Hemsereka DBPyî ya Wanî Şengule Polat û Hemserekê HDPyî yê Wanî Fîkret Doganî qala weçînayîşan kerde Dima namzetê wekîlîye yê Wanî Sinan Çîftyurekî pare kerd ke ê do şarî reyde bibê yew û ser bikewê. Qiseykerdişan ra dima şarî govende girewte.

Bedlîs de zî Partîya Çep a Keske namzetê xo Huseyîn Olan, Semra Çaglar Gokalp û Enver Barîn dayî şinasnayene. Girseyî bi konvoyan derbazê Buroyê Weçînayîşî yê Tetwanî bîyî. Girseyan bi coşî namzetê xo pêşwazî kerdî.

Namzetê Erdexanî Ozgur Taniş û Dîcle Akturk bi konvoyêkê pîlî Xoçvan de ameyî pêşwazîkerdene. Bi seyan kesî buroyê weçînayîşî de ameyî têhet û namzetê xo pêşwazî kerdî.

Namzetê Erziromî Merale Daniş Beştaş, Abdurahman Sever, Bahare Goksu û Ayşane Tarlan Meydanê Teyarayan de hetê girseyan ra ameyî pêşwazîkerdene û ver bi Rêxistina Partîya Çep a Keske şîyî.

Bi beşdarîya namzeta Qersî Gulcane Alp qezaya Cilawiz û Zerîşatî de buroyê weçînayîşî ameyî akerdene.

Namzetê Îdirî Aysel Aras û Yilmaz Hun hetê xeylêk îdarekar, hemserek, û endamanê partîyan û dezgehan ra ameyî pêşwazîkerdene. Namzetî bi konvoyan ameyî berdene bi mîyanê şaristanî. Namzetan tîya de qisey kerd û bale ante girîngîya weçînayîşî ser.

Mûş de namzetê wekîlîye bi merasîmêkê girseyî ameyî pêşwazîkerdene û dima pê konvoyan ameyî berdene bi buro. Namzet Sezaî Temellîyî tîya de qisey kerd û ard ziwan ke ê do Mûş de 3 wekîlîyan ra pêroyînan bigêrê.