Silêmanî de netîceyê kampanyaya îmzayan a vera qedexeyê serê PKKyî ameyî eşkerakerdene. Panel de ame vatene ke PKK têgêrayîşêkê azadîye yo û eleqeyê ci yê bi terorî çin o la dewleta tirke terorê dewlete kena.
Salona Xakî ya Silêmanî de bi panelêkî netîceyê kampanyaya îmzayan a vera qedexeyê serê PKKyî ameyî eşkerakerdene.
Panel de Akademîsyen Şoreş Hesenî, Pispora Qanûnanê Mîyanneteweyîyan Dr. Nikolaa Eşref û Akademîsyen Dr. Mihemed Sebirî qisey kerd. Înan ard ziwan ke PKK têgêrayîşêkê azadîye yo û eleqeyê ci yê bi terorî çin o la dewleta tirke terorê dewlete kena. Hîrê qiseykerdoxan zî waşt ke wa PKK lîsteya terorî ra bêro vetene.
Panel de dîya zanayene ke Başûr de heta nika seba ke PKK lîsteya terorî ra bêro vetene 300 hezar îmzayî ameyî arêdayene.
Netîcenameyê panelî hetê Endamê Îdareyê Kampanya Şadî Bekîrî ra ame wendene. Netîcenameyê panelî wina yo:
-Têkoşînê PKKyî goreyê madeya 3103. ya serra 1972yî ya Konseya Asayîşî ya Neteweyanê Yewbîyayeyan şorişê xelisnayîşê şaran o.
-Pênaseyê 'PKK rêxistinêka terorî' yo birêka qanûnî nê sîyasî ya.
-Menfeatanê sîyasî, leşkerî û ekonomîkan ra Ewropa û Amerîka PKK sey rêxistinêka terorî şinasna.
-PKK tek hêz o ke vera DAÎŞ û El Qaîde şer kerdo. Coka nêbeno ke mîyanê lîsteya terorî de ca bigêro.
-Ewropa û Amerîka wa PKK mîyanê lîsteya terorî ra vejê û PKKyî sey têgêrayîşêkê azadîgîrî bişinasnê.
-Tirkîya de tek rayîrê çareserîya meseleya kurdan dîyaloganê bi Abdullah Ocalanî yo.
-Eke PKK mîyanê lîsteya terorî ra bêro vetene no seba haştîye do bibo gamêke.
