Endama Koordînasyonê KJKyî Hêvî Nûda derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Qiseykerdişê Hêvî Nûda ra tay noqtayê girîngî wina yê:

''Dewleta tirke seba ke qels bena hîna zaf tedaya kurdan kena, raştîya kurdan înkar kena, polîtîkaya şerî visnena dewre. Erdogano faşîst bi vatişê 'ma pêro heman keştîye de yê'  keno ke şarê kurdî, şaranê Tirkîya, domanan, karkeran û cinîyan mîyanê rewşa krîzî de bifatisno. Ma heman keştîye de nîyê. Keştîya faşîste ya nê rejîmî pê qirkerdiş, neteweperwerî, nîjadperestî, komplo dekerde ya. Na keştîye de cinî û domanan rê cayêk çin o.

Dêrik de qirkerdişo le TIRanê Cengîz Holdîngî kerdo, rewşa hukmatê faşîstî yê AKP-MHPyî eşkera keno. No serebût yew qezayê trafîkî nêbi; serebûtêko rêxistinkerde bi. Dewleta tirke Zap, Avaşîn û Metîna de teng bîyo, coka nêwazeno verê ci de yew astengîye est ba. Senî ke ê Herêmanê Pawitişî yê Medya de vera gerîlayan çeka kîmyewîye xebitnenê, hetê madî û manewî ra zî bi hawayêkê bêkontrolî hêrişê şarî kenê. Wazenê vajê 'Verê mi de mevinderê, sey TIRanê Cengîz Holdîngî ez do bida peyê şima.' Ez venga şarê ma dana ke wa hesabê nê qirkerdişî biperso û verê hêrişanê AKPyî de baldar bibo. Nê kerdiş û metodê ci do nêeşkê rijîyayîşê AKP-MHPyî vindarnê.

Rejîmo faşîst keno ke pê hêrişanê xo îqtîdar de bimano. Çimeyo bingeyî yê nê hêrişan zî sîstemê îşkence û tecrîdî yê Îmraliyî yo. Seba ke Rayber Apo rayberêko sosyalîst û merdimîye yo û Rayberê Şarê Kurdî yo, her hêrişê vera ey yeno manaya hêrişê vera kurdan û merdimîye. Hetê bînî ra seba ke Rayberîye terefgîrê azadîya cinîyan o hêrişê vera ey yeno manaya hêrişê vera cinîyan. Xora ma vînenê ke hêrişê vera kurdan, cinîyan û demokratan senî zêdîyayê. Rayber Apoyî ra nika qet yew xebere nêna girewtene la ma zanenê ke o bi hawayêkê xurtî ho xo ver dano. Tecrîdo girankerde, cezayê hucreyî mîyanê na raştîye de bi hawayêkê zelalî dîyenê. No yeno a mana ke Rayber Apo hetê fikr, hîs û bedenî ra nêro çinkerdene. Gerîlayê ma hêzê xo ney ra gênê û vera dişmenî bi hêz, ruh û ferasetî şer kenê.

Şiknayîşê na polîtîkaya qirkerdişî seba Kurdîstanî û pêro herêma ma zaf girîng o, dîyarker o. Şiknayîşê na polîtîkaya qirkerdişî do Îmrali de dest pêbikero û uca ra pêl bi pêlî vila bibo, binê hawayî azadîye û çareserîye do vila bibê. Seba kurdan girîng o ke verê xo bidê azadîya Rayberîye, karanê xo nê esasî ser o bikerê, paradîgmaya Rayberîye vila bikerê, bi merdimîye bidê şinasnayene.''