Partîya Çep a Keske semedê namzedanê xo yê Amedî aktvîteya verwazîkerdişê bi girseyî organîze kerde. Namzedê ke qezaya Peyasî de bi konvoyê wesayîtan ameyî verwazîkerdene, kuçeyanê Amedî de şar silam kerd û dima Yenîşehîr de tewrê akerdişê buroyî bîyî.

Namzedê Partîya Çep a Keske yê Amedî Berdan Ozturk, Halîde Turkoglu, Cengîz Çandar, Adalete Kaya, Serhat Eren, Mehmek Kamaç, Ceylan Akça Cupolo, Mehmet Emnîn Aktar, Azad Bariş, Sorgule Aytek Avşar, Samet Menguç û îdarekarê HDPyî , rêxistinê komelê sîvîlî û xeylêk hemwelatîyî tewrê akerdişî bîyî.

Wesayîtê ke bi beyraqanê Partîya Çep a Keske ameyî xemilnayene qezayanê Peyas û Rezanî de bi muzîkê vîjnayîşî gêrayî. Şarî zaf eleqe mojna namzedan. Tay cayan de hemwelatîyan pê bisîkletan konvoy teqîp kerd. Cinîyan zî pencere û balkonanê xo ra bi tîlîlîyan nîşanê serkewtişî da.

Dima ra pîya bi namzedanê Partîya Çep a Keske xeylêk kesî ver bi buroyî rayra şîyî. Polîsan waşt verê şar bigêrê la şarî bi slogana “zextî nêeşkenê verê ma bîgêrê” cewab da. Pê def û zûrna û deyîranê kurdkîyan govende ameye girewtene û sloganê  “Jin, jiyan, azadi” ameyî vatene.

Hemserekê KCDyî û namzedê Amedî Berdan Ozturkî vat: “Amedî bi nê girseyî cewabê xo da. Nê bi serran o sozê qedînayîşê  kurdan danê, îqtîdarê AKP- MHPyî waşt kurdan biqedîno. Tepiştiş, merg ma her çî ciwîyayî la sîyasetê înano leymin qedîya. No vîjnayîş do bibo vîjnayîşo tarîxî. Nê vîjnayîşî de Amed gerek heme wekîlanê xo vejo û cewabê dişmenê kurdan bido. ” 

Ozturî bale ante tecrîdê ser Rayberê Şarê Kurdî Abdullah Ocalanî ser û vat: “Birêz Ocalan rayîrê muzakereyî yo. Çare muzakere yo. Şima hende qirkerdişî kerdî la kudî nêqedîyayî. Şarê Amedî do cewabê xo bido. Ma do bi rayîrê hîrêyinî demokrasîyî ronê. Kam ke haştîye, demokrasî û cuya secîye wazeno do sandiq de cawabê xo bido.”

 Halîde Turkoglu zî vat: “Ma sey 12 wekîlan semedê her çîyê ke ma ra ameyo diznayene, ameyî. Înan waşt ke îradeyê ma bidiznê la ma ganî yê, payra yê. Ma reyna mojna ke ma bêalternatîf nîyê, rêxistinkerde yê. Ma do hesab bipersê û neweyî pêro pîya înşa bikerê. Disa em disa serkeftin.”