Endamê Doktoranê Astengkerdişê Şerê Nukleerî yê Mîyanneteweyîyî û pîsporanê bîyolojî ra Jan Van Aken û Josef Savarî semedê cigêrayîşê hêrişanê pê çekanê kîmyewîyan ê ke qirkerdişê Halebçe ra dima Başûrê Kurdîstanî de yenê kerdene Herêma Kurdîstanî zîyaret kerd.

Heyetî Silêmanî de Ofîsê Parlamentoyê Herêma Kurdîstanî zîyaret kerd û serekê ofîsî reyde pêvînayîş kerd. Dîya zanayene ke pêvînayîşî de çekê kîmyewîyê ke Herêma Kurdîstanî de yenê şuxulnayene ameyî destgirewtene.

Badê pêvînayîşî kombîyayîşê çapemenîye ame kerdene. Jan Akeno ke 25 serrî yo cigêrayîşê çekanê kîmyewîyan keno vat: ‘’Ma peykerê Halebçe û Enfalî zîyaret kerd.  Ma waşt şirê Amedîyê û biresê dewanê Hirur û Kanî Masî. Goreyê raporanê ke resayê ma a herême de çekê kîmyewîyî yenê şuxulnayene. Ma zî waşt şirê ûca cigêrayîş bikerê û rapor amade bikerê. Ma waşt maxdûrê çeka kîmyewîye Hacî Abdullahî dir qisey bikerê la qeymaqemê Amedîyê destûr nêda.’’

Heyetê ewropayijî veng da Hukmatê Herêma Kurdîstanî ke wa Neteweyanê Yewbîyayeyan ra cigêrayîşê şuxulnayîşê çekanê kîmyewîyan biwazê  û raporê ci biresnê Rêxistina Çekanê Qedexeyan ê Dinya. Heyetî Hukmatê Herêma Kurdîstanî ra waşt seba ke wa yewna qirkerdişo sey Halebçe mebo destûrê cigêrayîşê çekanê kîmyewîyan bidê.