Hêzê PDKyî 27ê tebaxe ra nata kenê ke ver bi Girê Amedîyê yê Metîna û Warê Xoverdayîşî yê Girê Hekarî rayîran virazê. Dîmenê viraştişê rayîrî resabî destê ANFyî û weşanîyabî.

Dima Fermandarîya Qerargehê Merkezê Pawitişê Şarî (MPŞ) babete ser o eşkerayîyêke dabî û PDK hişyar kerdbi. Eşkerayîye de wina amebi vatene: ''Mudaxeleyê şerê ma yê demokratîk, neteweyî û stratejîkî nêkerê ke ver bi serfîrazîye şino.''

Rixmê nêrazîbîyayîşê şarî zî PDK viraştişê rayîrî ra dewam keno. Dîmenanê neweyan de zî aseno ke hêzê PDKyî seba ke hêzanê dewleta tirke bipawê mewzî û rayîran virazenê.

Dîmenê  ke 12ê êlule de ameyê qeydkerdene tede asenê ke dormeyê Amedîyê û dewanê ci de vengêk waranê gerîlayan mojneno û vano ke girê Amedîyê warê xoverdayîşî yê gerîlayan ê. Wayîrê vengî vano ke nê girî Girê Çarçel û Hekarî yê û wina dewam keno: ''Nê rêzê koyan Girê Hekarî yê, bin de Girê Sêdare aseno, Heta Parka Amedîyê warê komandoyan o. Girê Şehîd Pîrodagn, Girê Amedîyê û Sêdare pêro Ware Xoverdayîşî yê Girê Amedîyê yê. Tîya pêro warê xoverdayîşî yê gerîlayan o.

Seke aseno PDK seba ke artêşa tirke bipawo nê rayîrî heta warê xoverdayîşî yê gerîlayan berdê. Hêzê PDKyî reyna hemkarîya artêşa tirke kenê. PDK seba ke artêşa tirke bipawo nê rayîr û mewzîyan virazeno. Ma her roje ney pê çimanê xo vînenê. Nê cayan de leşkerê tirkî cabîyê. Artêşa tirke xoverdayîşê gerîlayan ra teng bîya. Girê Sêdarê, Girê Amediye, Girê Şehîd Pîrdoxan, Girê Hekarî û warê komandoyan çar mengî yo xo ver danê. La heyf ke PDK seba ke artêşa tirke bixelisna xayînîye keno.

Hêzê PDK her roje seba leşkeranê tirkan erzaq, awe û wesayîtan kirişenê. PDK û artêşa tirke heman ê. Ê pîya vera gerîlayan mewzîyan virazenê.Gerîlayî vera îşxalî her roje şer kenê. La PDK ney nimneno. PDK leşkeranê xo nê mewzîyan de cakeno.''