28ê tebaxe de bajarekê Kifrî de Endamê Konseya Rayberdişî ya Tevgera Azadî Mamosta Şemal amebi qetilkerdene. Merkezê PENa Kurdî derheqê qetilbîyayîşê Mamosta Şemalî de eşkerayîyêke daye.

Merkezî eşkerayîye de 'no hêrişo wehşî û xayîn' şermezar kerd. PENa Kurdî vat: ''Pawitişê rojnameger û nuştoxan erkê hêzanê asayîşî yê hukmatê Herêma Kurdîstanî yo.''

Eşkerayîye wina ya: ''Mamosta Şemal (Suheyl Xurşîd Ezîz) 1960 de Kifrî de dadîya xo ra bîyo. Ey kurdkî ra ber erebkî û tirkmendkî zî hol zanayêne. Eu 1980 de dest pê nuştişê şîîranê erebkî kerd û 1997-98 de rojnameyê Welatî de nuşteyê sîyasîyî nuştî. Serranê 2000an ra pey zî cigêrayîşê ey ê serê cografya û tarîxî weşanîyayî.

‘Dîroka Herêma Kifriyê Ji Demên Kevnar Heta 1958’ê’, ‘Çînên Civakî û Rêxistinên Siyasî Yên Germiyanê di Navbera Salên 1870-1970’yî de’, ‘Atlasa Kerkûkê li Gorî Rastiyên Dîrokî û Civakî’, ‘Atlasa Başûrê Kurdistanê 1850-2008’ tay eseranê ey ra yê.

Heyf ke Başûr de reya verêne rojnameger û nuştoxî nêameyê hedefkerdene. Eke serebûtanê bînan de kiştoxî biameyêne tepiştene û cezakerdene Mamosta Şemal do nêameyêne qetilkerdene.

Ma sey PENa Kurdî nê hêrişê wehşî, gemarin û xayînî şermezar kenê û wazenê ke cade faîlî bêrê tepiştene û cezakerdene.''