Komîteya Paştdayîşê Bi Keyeyanê Şehîdan bi eşkerayîyêka nuştekîye da zanayene ke xebatkara çapemenîye ya YJA-Starî Şaristane Asmîn (Leyla Yildiz) netîceya nêweşîyêka girane de şehîd bîye. 

Eşkerayîye wina ya:

''Têkoşînê azadîye yê Kurdîstanî yew raştîya komelî îfade keno. Hema roja verêne ya nê têkoşînî de bi hezaran ewladê şarê ma herikîyayî têkoşînê azadîye û şehîd bîyî. Ewro têkoşînê şehîdan o bêmabên dewam keno. Nê şehîdan ra yewe zî embaze Şaristane Asmîn (Leyla Yildiz) a.

Embaze Şaristane 1981 de Mersîn de mîyanê keyeyêkê botanijî de dadîya xo ra bena. Keyeyê embaze Şaristane sebebanê ekonomîkan ra koçê Mersînî keno la qetî kokê xo ra anêbirîyeno. Embaze Şaristane Komployê Mîyanneteweyî yê vera Rayber Apoyî ra dima 1999 de agêrena Botanî û bena gerîla. Embaze Şaristane heta 2002yî warê Qendîlî de pratîkî kena. A 2002 de derbazê warê Xinêre bena û PJA de perwerde vînena. Embaze Şaristane dima Akademîya Şehîde Bêrîtane de zî perwerde vînena û tim xo aver bena. A Zap de têkoşîn kena û tecrubeyanê xo zêdînena.

Embaze Şaristane pê kesayetê xo yê fedakar û perwerî her warî de bale ancena. A yew destê xo de kamera û destê xo yê bînî de çeke seba azadîya cinîyan û Kurdîstanî têkoşîn kena. A wextêkê dergî xebatanê çapemenîye yê YJA-Starî de cagêna. Embaze Şaristane hêrişanê DAÎŞî yê vera Şingalî dana eşnawitene û teyna tîya de ney Mexmûr, Şingal û Kerkûk de zî sey şerwane û xebatkara çapemenîye erkê xo ana ca.

Embaze Şaristane 2016 de reyna Akademîya Şehîde Bêrîtane de perwerde vînena. O çax a pê nêweşîyêka xedare kewena. A têkoşînê xo yê 24 serran de bîye sembola embazîye, tewrbîyayîşê raştî, perwerîya bêşerte û teqîbkerdoxa raşte ya Rayber Apoyî. Embaze Şaristane peyê xo de mîrasêkê têkoşînî yo pîl verda û 3yê hezîrana 2023yî de nêweşîya xo ra tewra karwanê şehîdan bîye. Ma sere de keyeyê aye yê ercîyayeyî rê, şarê Kurdîstanî yê welatperwerî rê serweşîye wazenê. Ma şexsê Şaristane Asmîn de pêro şehîdanê xo bi minet û rêzî yad kenê. Ma soz danê ke xeyalê şehîdanê xo Kurdîstanê azadî qetî bîyarê ca.''

Nasnameyê şehîde wina yo:

Nameyê Qodî: Şaristane Asmîn

Name û Peyname: Leyla Yildiz

Tarîx û Cayê Bîyayîşî: 1980/Mersîn

Maye-Pî: Hedîye-Alî

Tarîx û Cayê Tewrbîyayîşî: 1999/Mersîn

Tarîxê Şehadetî: 3yê Hezîrana 2023yî