Komîteya Rayberdişî ya PKKyî bi eşkerayîyêke Fermandare Leyla Sorxwîn yad kerde. Eşkerayîye wina ya:

''Her roje asta serkêşîye de embazê ma tewrê karwanê şehîdan benê. Tewr peyên cinîya qehremane ya Amed û Kurdîstanî, Endama Komîteya Merkezî ya PKKyî, Endama  Konseya Fermandarîye ya HPG û YJA-Starî, Fermandarê Warê Botanî embaze Leyla Sorxwîn şehîd bîye. Ma embaze Leyla bi minet û rêzî yad kenê. Ma soz danê ke têkoşînê aye tim aver berê û biresnê serkewtişî. Şar û cinîyê kurdê ke milîtanê ercîyayeyî û fermandarê sey embaze Leyla mîyanê xo ra vetê, qetî do bin nêkewê, cuya koletîye qebul nêkerê û xeta azadîye de tim serkewtişanê pîlan bivinê destî. Şexsê embaze Leyla de ma şehîdanê çêran ê Gulane û şehîdanê têkoşînê ma yê azadîye bi rêz û minetî yad kenê.

Embaze Leyla qijîya xo de Bismilê Amedî de tewra PKKyî bîye. Aye mîyanê PKKyî de tim cepheyê vernî de cagirewt. A şerwanêka fedakare û qehremane bîye, her aste de zî fermandarîye kerde. Aye hetê îdeolojî û rêxistinîye ra felsefeya Rayberîye de xo aver berd. Embaze Leyla bi nê taybetmendîyanê xo tim hêz û moral dayêne embazanê xo. Aye têkoşînê azadîye de isrardar bîye, kesayetê Apogîrî xo de temsîl kerd.Aye bi serran sey Endama Fermandarîya Leşkerîye ya HPG û YJA-Starî û Konseya PKKyî wezîfe kerd. Embaze Leyla xeta Egîd û Zîlane de bîye fermandare. Aye seba servistişê Şerê Şarî yê Şorişgêrî kedêka pîle daye. A nê esasî ser o şehadetê Fermandara YJA-Starî Delale Amed ra dima derbazê Botanî bîye û tîya de şehîd bîye.

Rayber Apoyî vatbi 'PKK partîya cinîyan a.' Têgêrayîşê azadîye yê cinîyan bi na felsefe bi gerîla, partîye û sîstemê cinîyan aferna. Têgêrayîşê azadîye kerd ke cinîyî azad bibê û wayîrê îrade bibê. Hetê îdeolojîk, rêxistinî û sîyasî ra şorişê azadîye yê cinîyan resa astêka girînge. Embaze Leyla Sorxwîn zî nê milîtananê serkêşan ra yew bîye ke têkoşîn aver berdo. Seba ke Şorişê 'Jin, Jiyan, Azadî' dinya de vila bibo embaze Leyla rolêko girîng kay kerd.

Embaze Leyla nê prosesê têkoşînî de mesuldarî, fedakarî û çêrîya Apogîre asta berze de mojnaye. Vera tecrîdê Îmraliyî aye tewr bernî de têkoşîn kerd. A sey embaze Delale Amed Amed de tewra têkoşînî bîye, Botan de bîye yew, welatperwerî û xoverdayîşê şar û cinîyan resna leweyê tewr berzî. Coka seba rijnayîşê faşîzmê AKP-MHPyî û seba Kurdîstanê Azadî û Tirkîyaya Demokratîke kedêka pîle daye.

Bêguman nê kedê Fermandara Bêmerge Leyla Sorxwîne qetî do nêrê vîrakerdene. Embaze Leyla bi tewirê xo, tewrbîyayîşê xo, perwerîya xo ya bi Rayber Apoyî û taybetmendîya xo ya tim rayîrî do bimojna ma. Ganî sere de cinî û ciwanê Amed û Botanî pêro cinî û ciwanê Kurdîstanî embaze Leyla hol fam bikerê, tewrê gerîlayan bibê, têkoşînî bikerê û serkewtişî bivisnê destî, xeta Rayberîye û şehîdan de xo ver bidê, sîstemê îşkence û tecrîdî yê Îmraliyî parçe bikerê û azadîya Rayber Apoyî bîyarê ca. Ganî têkoşînê azadîye û estbîyayîşî de şehîdê ma tim bibê meşaleya azadîye ke rayîrê ma roşnî kenê.

Nê esasî ser o ma Fermandara Bêmerge ya cinîyan û şarê kurdî Leyla Sorxwîn ancî bi rêz û minetî yad kenê. Ma venga pêro cinî û ciwanan danê ke xeta embaze Leyla de hîna bi xurtî tewrê têkoşînê azadîye bibê.''