Komîteya Rayberdişî ya PKKyî bi wesîleya serrgêra Komployê 9ê Teşrîna Verêne eşkerayîyêke daye. Eşkerayîye wina ya:

''Ma hê kewenê serra 25. ya Komployê Mîyaneteweyî yê 9ê Teşrîna Verêne ya 1998î yê vera Rayber apoyî. 24 serrî yo asta komployî de hêrişê faşîst-qirkerî dewam kenê û xoverdayîşo tewr manadar yeno kerdene. Her çî ra ver ma nê Komployî şermezar kenê. Rayber Apo 24 serrî yo bi xoverdayîşêkê îstîsnayî komplo pûç kerdo, hêzê komplogerî bin kerdî û sîstemê tecrîd û îşkenceyî yê Îmraliyî şiknayo. Ma nê xoverdayîşê Rayber Apoyî selam kenê. Ma şehîdanê 'Şima nêeşkenê tîja ma tarî bikerê' bi heskerdiş û minetî yad kenê. Şarê ma û dostê ma 24 serrî yo bi çêrî vera komployî têkoşîn kenê û do komployî bin bikerê. Serra 25. ya têkoşînî de ma nînan rê serkewtiş wazenê.

Seke zanîyeno ke hêrişê Komployê Mîyanneteweyî seba îmhakerdişê Rayber Apoyî, serkêşîya Amerîka, Îngilîstan û Îsraîlî de hetê hêzanê modernîteya kapîtalîste ra ameyo plankerdene û caardene. Axir peynî de înan merdimîye viste nê halî. Ma venga nê hêzan danê ke serrgêra 24. ya Komployî de netîceyanê ci bi raştî biercnê, şaşîyanê xo sereraşt bikerê û sûcanê xo bidê efûkerdene.

Hêzanê komplogeran bi îmhakerdişê Rayber Apoyî, bi tasfîyekerdişê PKKyî û qirkerdişî waşt ke azadîya şarê kurdî û demokratîkbîyayîşê Tirkîya û Rojhelatê Mîyanênî asteng bikerê. Vera na hêrişkerîye sey şar û têgêrayîşê ma serkêşîya Rayber Apoyî de 24 serrî yo ma xo ver danê. Sere de gerîlayê ma û têgêrayîşê ma yê cinî û ciwanan, şar û dostanê ma bi bedelan seba azadîya Kurdîstanî têkoşîn kerd. Netîceyê nê têkoşînê 24 serrî wina yê; hêzanê komplogeran merdimîye berde verê felaketî la têkoşînê azadîye yê Kurdîstanî seba pêro merdimîye bi çimeyêkê neweyî yê îlham û hêvîye. Karo ke ma mîyanê 24 serran de kerd eyneyê karê ma yê serra 25. ya Komployî do bibo.Hêzê ma yê gerîlayan sere de Zap, Metîna û Avaşîn de her warî de çalakîyanê pîlan kenê û mojnenê ke ê do serkêşîyê xoverdayîşê azadîye bikerê. Cinîyanê kurdan bingeyê Jineolojî de şîarê 'Jin, Jiyan, Azadî' vila kerd û mojna ke seserra 21. do biba seserra cinîyan û têkoşînê vera komployî eşkera kerd. Şar û dostê ma vera komployî çalakîyan kenê û nê çalakîyî mijdanîya rijnayîşê sîstemê tecrîd û îşkenceyî yê Îmraliyî û caardişê azadîya Rayber Apoyî danê.

Bi taybetî çalakîya fedayî ya embaze Sara û Rûkene ya Mersînî rejîmê AKP-MHPyî binî ra lerzna, mojna ke Rayber Apo hetê Zîlanan ra pawîyeno û metodê têkoşînê vera sîstemê Îmraliyî reyna eşkera kerd. Ma na çalakîya tarîxîye selam kenê û şerwan û fermandaranê na çalakîye zî fîraz kenê. Embaze Sara û Rûkene zî ma bi rêzdarî û minetî yad kenê. Ma wazenê wa her kes bizano ke cinî û ciwanê kurdî vera faşîzmê AKP-MHPyî sey Sara û Rûken ê. Ma venga ciwananê kurdan danê ke rêçê embaze Sara û Rûkene de têkoşîn bikerê.

Eşkera yo ke faşîzmê AKP-MHPyî seba ke qesasê çalakîya Mersînî bigêro Silêmanî de Endama Merkezê Cigêrayîşî yê Jineolojî Nagîhane Akarsel bi namerdî qetil kerde û kerd ke cinîyan bitersno. La a raşte tersê xo yê vera cinîyan mojna. Îşxal, qirkerdiş û hêrişkerî çend giranî bibê zî faşîzmê AKP-MHPyî do gonîya ke rijneno de bifatiso. Bêguman no binkewtişê înan serê bingeyê têkoşînê cinîyan de do bêro kerdene.

Ma reyna embaze Nagîhane Akarsel bi rêz û heskerdişî yad kenê. Sere de cinîyê kurdî ma venga ciwanan û kedkaran danê ke raştîya Nagîhane Akarsel fam bikerê û seba caardişê armancanê aye, serê rêçê aye de bibê. No hêriş mojneno ke dişmeno qirker eşkeno bi her hawayî hêrişanê namerdan bikero. Coka ma ganî raştîya dişmenî bişinasnê û têkoşînê xo birêxistin bikerê. Ça de benê wa binê şorişgêr û welatperwerî ganî mîyanê şerêkê pîlî de bibê û vera dişmenî tedbîran bigêrê, baldar bê, xo bipawê û bi nê hawayî têbigêrê.

Verê serrgêra 24. ya Komployê Mîyanneteweyî, nêzdîyê hîrê hewteyî yo Rojhelatê Kurdîstanî û Îranî de serebûtê tarîxîyî qewimîyenê. Dima ke Jîna Emînî ameye qetilkerdene cinîyan dest pê serewedaritişî kerd û no serewedaritiş pêro komelî ra vila bi. Na rewşe do tesîrê her kesî û bi taybetî tesîrê Îranî bikera. Sîyaset û hişmendîya kanwaze ya serdestîya camêrdan kewtî mîyanê tersî. Ame dîyene ke bi azadîya cinîyan dinyayêka newîye awan bena. Bêguman no serebût seba pêro Rojhelatê Mîyanênî û dinya zî girîng o. Eşkera yo na rewşe do vurîyayîşanê pîlan bikera. Ma venga her kesî danê ke paştî bido waştişanê meşrûyan ê cinîyan, meseleyan bi dîyalogan çareser bikero, vera şarî bi şîdetî têmegêro. Ma serewedaritişê cinîyan zî selam kenê û pê bawer ê ke ê do netîceyanê serkewteyan bivisnê destî.

Pê destpêkerdişê serra 25. ya Komployê Mîyanneteweyî ma sey şar û têgêrayîşî ma prosesêkê zaf krîtîkî de yê. Faşîzmê AKP-MHPyî seba rijnayîşê xo vindarno heta tira yeno hêrişê gerîlayan ken, tedaya Rayber Apoyî û şarê ma giran keno. Tecrîd û îşkenceyê Îmraliyî pêro zîndanan rê vila bîyo. Bêguman gerîlayê azadîye û şarê kurdî firsendî nêdê nê faşîzmî, serê şerê şarî yê şorişgêrî de xoverdayîşê topyekûnî bikerê û faşîzmê AKP-MHPyî birijnê. Gerîlayê azadîye hê rayîrê ma roşnî kenê. Serkêşîya cinî û ciwanan de şarê ma û dostê ma mîyanê xoverdayîşêkê pîlî de, wayîrê ê hêzî yê ke faşîzmî birijnê û azadîye bivisnê destî.

Serra 25. ya têkoşînê vera komployî do biba serra şiknayîşê Komployî, serra rijnayîşê faşîzmê AKP-MHPyî ke keno ke komployî rê dewam bikero, serra parçekerdişê sîstemê îşkence û tecrîdî yê Îmraliyî û caardişê azadîya Rayber Apoyî. Armancê ma no yo û seba caardişê ney hêz û îradeyê ma est o. Ma do serra 25. de nê esasî ser o şer bikerê û qetî do ser bikewê.

Nê esasî ser o ma venga şarê xo û dostanê xo danê ke raştîya serra 25. ya Komployê Mîyanneteweyî raşt fam bikerê, têkoşînê serra 25. serê xeta serkewtişî ya fedayî de her ca de têkoşîn bikerê, bi têkoşînî cewab bidê komployî, sîstemê tecrîd û îşkenceyî yê Îmraliyî parçe bikerê û azadîya Rayber Apoyî bîyarê ca.''