Partîya Çep a Keske Wan de xebatanê weçînayîşî rê bi xurtî dewam kena. Partîye armanc kena ke Wanî ra 8 wekîlîyan bigêra. Namzetanê Wanî yê Partîya Çep a Keske ra Gulcane Sayyîgît derheqê xebatanê înan de ANFyî rê qisey kerd.

Namzeta Wanî ya Partîya Çep a Keske Gulcane Sayyîgît sey hemşaredare amebî weçînayene la dest nîyabî erkê ci ser.

Sayyîgîte da zanayene ke qedexe û tedayî pê înan do nêeşkenê û ê do Meclîs de seba çareserîya meseleya kurdan, meseleyanê cinîyan û heqê perwerdeyê bi ziwanê dayîke têkoşîn bikerê.

Sayyîgîte vat: ''Sere de seba cinîyan, ez do seba çareserîya meseleya kurdan, seba bindestan, xoza, ziwanê dayîke, wedaritişê tecrîdî û heqanê tepişteyan têkoşîn bikera. Mazbataya min a hemşaredarîye nêdîyaye mi la no nêeşka ke mi şarî ra abirno. Hema hema her roje ma şarê xo reyde yê, mîyanê şarî de yê. Seba temsîlîya şarê ma û seba îradeyê şarê ma, xebatê ma dewam kenê. Naye ra pey zî xebatê ma yê sîyasîyî heta peynî, hem Meclîs de hem zî mîyanê şarî de do dewam bikerê.''