Serekê Amedsporî Metîn Kilavuzî îfade kerd ke bi tênakerdişî yeno waştene ke Amedspor bêro çinkerdene û seba paştdayîşî vengdayîş kerd û vat: "Sewbîna yew Amedspor çin o, wayîrê taximî bivejîyê''.
Amedspor tim rastê tedayan yeno. 4 serrî yo ke seba Amedsporî ''qedexeyê terefgîran'' esto. Sîyasetmedarî Amedspor sey hedef mojnenê, mufetîşî timî tehqîqatê malîyî danê destpekerdene û qeyûmî zî hetkarîya ekonomîkî ya seba Amedsporî qedînenê. Amedspor seba ke krîzê ekonomîkî ra bixelîso gêreno çareserîyan û xebetanê xo dewam keno.
Serekê Amedsporî Metîn Kilavuzî Ajansê Mezopotamya (MA) reyde qisey kerd û pare kerd ke meseleyê fînansalî verê taximî de astengê pîlî yê.
Kilavuzî da zanayene ke Amedspor mîyanê şer û mercanê zoran de têkoşînê xo dewam keno û ard ziwan ke eke şar hetkarîya Amedsporî bikero tay meseleyî do çareser bibê. Kilavuzî venga heskerdoxanê Amedsporî da ke paştî bidê Amedsporî.
Kilavuzî vat: ''Yeno waştene ke bi tênakerdişî Amedspor bêro çinkerdene. Wazenê ke bi hawayêkê madîyî ma terbîye bikerê. Dormeyê ma ame girewtene. Mesela ma xîretê caardişê estbîyayîşê ma ya. Ma venga pêro kesan û heskerdoxanê Amedsporî danê ke nê prosesî de paştî bidê ma, wayîrê Amedsporî bivejîyê. Çubke sewbîna yew Amedspor çin o. Eke meseleyê ma yê ekonomîkî çareser bibê ma do zaf bibê rehet û ser bikewê."
