Dêrsim de Meydanê Seyîd Rizayî de seba Seyîd Riza û embazanê ci serrgêra 83. ya dardekerdişê înan de saete 19.37 de merasîmêkê yadkerdişî ame kerdene. Merasîm bi qiseykerdişan dest pêkerd. Dima beşdaran çilayî vistî ta û loqmayî vila kerdî. 

Hemvervatoxê Komîsyonê Bawerî û Şaran ê HDPyî merasîm de qisey kerd û vat: ''Ez nê çêranê ke sereyê xo da barbarîye bi rêzî yad kena. Tarîxê ma pê qirkerdişan pîl o û ma qet yew dewrê tarîxî de bi aramî nêciwîyayî.''

Wekîla HDPyî Tulaye Hatîmogullari zî vat: ''Ma Dêrsim xo vîr a nêkerd. Binê pêro kerrayanê Dêrsimî de dejêko pîl esto. Rojêke heq û heqîqat do bêrê ca. Heta a roje têkoşînê ma do dewam bikero.''

Endamê EMEPî Kadîr Ulaşî zî ard ziwan ke arşîvê dewlete îsbat kenê ke Dêrsim de qirkerdişêko pîl ame kerdene.

Merasîmê yadkerdişî bi wendişê lorikan qedîya.