Endamê Komeleya Karkeran a Mezopotamya ya Silêmanî Huseyîn Arasan 9ê hezîrane de verê komele de raştê hêrişê çekdarî amebi û vizêr nêweşxane de şehîd bibi.

Cenazaya Arasanî  morgê tibê edlîyî ra ameye girewtene û ameye berdene Camîya Ahmedî Haci Alîyî.

Qiseykerdişê camî de Musa Çîftçîyî vera hêzanê asayîşî hêrsê xo ard ziwan û nê vatî:  “Heta ewro vera bi desan embazanê ma hêriş ame kerdene. Kiştoxê heme qetilkerdişan eşkera yê la vera nê hêrişan qet tedbîrêk nîno girewtene. Ferhat Bagişkondu, Mamoste Şemal, Şukru Serhed, Nagihan Akarsel, Mehmet Zeki Çelebi, tewr peynî de Duhok de vera Huseyîn Turelî hêriş ame kerdene. Ma vanê hinî bes o. Ma zaf rey  eşkerayîye daye û vat  ma kam ê. Ma sîyasetmedarê kurdan ê. Ma multecîyê sîyasî yê. Bajarêkê kurdan de hêrişî benî û qet çew nîno tepiştene.  Kurdî yenê qetilkerdene û çew nîno tepiştene. Kiştoxî qetil kenê û remenê şinê Hewlerî. Sîlêmanî de hende kamerayî est ê. Qey kiştoxî nînê vîayene? Tîya yew mêşna bimire, Vakurê Kurdîstanî de bi desan kesî yenê destbendkerdene. Di rojî yo hema qet yew îdarekarê nê bajarî, îdarekarê hukmatî eşkerayîye nêdaya. Heta ke kiştoxî nêrê tepiştene wa çew dersa kurdîtîye û Kurdîstanî medo ma.” 

Dima ra cenazaya Arasanî semedê definkerdişî  bi desan wesayîtan û bi seyan kesan ameye berdene Şehîdgehê Mehmet Karasungurî yê Qendîlî.