Komîteya Şaran û Bawerîyan a KCKyî bi wesîleya Roşanê Remezanî eşkerayîyêke daye. Eşkerayîye wina ya:

''Alemê Îslamî û komelanê misilmanan emser mîyanê zor û zehmetîyanê pîlan de rojeyê Remezanî temam kerd. Ma hêvî kenê ke Roşanê Remezanî yê 2023yî seba pêro şaran bibo wesîleya edalet, azadîye û têdûştîye û mabênê şaran û dînan de zî wa bibo wesîleya wayûbiratîye, haştîye û yewîye, cuyêka demokratîke. Sere de misilmanê Kurdîstanî ma Roşanê Remezanî yê pêro misilmanan fîraz kenê.

Sey şarê Kurdîstanî ma roşanî mîyanê prosesêkê giranî de pêşwazî kenê. Erdlerz felaketê xozayîy ra zêdeyêr hetê îqtîdarê AKP-MHPyî ra vurîya hacetêkê qirkerdişî. Seba ke tedbîrê hewceyî nêameyê girewtene, şarê ma rê bi felaketêko pîl. Hukmatî bacê erdlerzî seba armancanê xo yê gemarinan xerc kerdîş, pêşkêşê dizd, kiştox, tecawuzker û bazirganan kerdî. Dima zî vat 'qeder o' û waşt ke înan rê helal bibo. Seba ke serebûtê xozayî nêbê sebebê felaketî tedbîrî ganî bigêrîyê. Hukmatê AKP-MHPyî yê faşîst tedbîrêk zî nêgirewt û 100 hezar ra zêdeyêr merdimanê ma dinyaya xo bedilnaye. No qeder nê, qirkerdişêko qestî bi. Şarê ma ganî hesabê ney qirkeran ra bipersê. Şarê ma do herêma erdlerzî de bibo dermanê derdanê yewbînan. Şarê kurdî û hêzê demokratîkî do roşan de birînanê şarê ma yê mexdûrî bipêşo û hewcedaran rê bibo derman.

Weçînayîş firsendêko pîl o

Sere de seba şarê kurdî, seba pêro şar, bawerî, cinî û ciwananê Tirkîya weçînayîşî firsendêko pîl o. Bi taybetî zî seba şarê kurdî nê weçînayîşan de prosesêkê pîlî de têrî yo. Seba ke no proses hîna zaf faydeyê kurdan, elewîyan, ereban, şaran û bawerîyanê cîyayan bikero ganî ma xo rêxistin bikerê û bi metodê seferberîye tewrê prosesî bibê. Çunke prosesê weçînayîşî hem seba şaranê Tirkîya hem zî seba komelê Kurdîstanî prosesêko girîng o. Têkoşîno ke têgêrayîşê azadîye 50 serrî yo keno, îqtîdaro faşîst visto mîyanê prosesê weçînayîşî. Şarê kurdî qerardar o ke nê weçînayîşan de ser bikewo.

Qasê îbadetî xêr o

Coka ganî bizanîyo ke xîretê seba azadîye, edalet, têdûştîye û haştîya komelkîye têkoşînê nê oxirî qasê îbadetî xêr o. Pêro misilmanê ke Tirkîya de bawerîya demokrasî û azadîye kenê, ganî bêteredut tewrê prosesî bibê. Şar û bawerîyê Tirkîya, kulturê Tirkîya do çarenûsê xo nê weçînayîşan de dîyar bikerê. Nê weçînayîşan de zî Partîya Çep a Keske do bi rolêkê dîyarkerî wirza we.

Wezîfeyê pêro bawermendan o

Şarê kurdî dima ke Îslamîyet qebul kerd şar û bawerîyanê cîyayan de tim mîyanê destek û dostanîye bi. Bi taybetî 50 serranê peyênan de têgêrayîşê azadîye bi zanayîşî no kultur xurtêr kerd. HADEPî ra heta HDPyî û Partîya Çep a Keske erjê nê têkoşînî yê. Ganî Îtîfaqê Kede û Azadîye nê weçînayîşan de bêro servistene. Sere de Kurdîstan de her cade ke şarê kurdî tede yo, vera hişmendîya îqtîdarî ya ke qirkerdiş ferzê kurdan keno, Rayber Apoyî rê tecrîd ferz keno, wezîfeyê pêro dîndar û bawermendan o ke têkoşîn bikerê.

Ma roşanê yewbînan fîraz bikerê

Roşan de ganî keyeyê tepişteyan bêrê zîyaretkerdene, paştî bêra dayene înan. Reyna roşan de ganî ma wayîrê şehîdan hîna zaf vejîyê, înan yad bikerê û şehîdgehan zîyaret bikerê. Ganî keyeyê şehîdan teyna nêrê verdayene û bêrê zîyaretkerdene. Sey têgêrayîşî bi wesîleya roşanî ma verê vîrameyîşê şehîdanê xo de bi rêzdarî û minetî rîyê xo anê war û soz danê ke têkoşînê înan heta serkewtişî pîl bikerê.

Bi taybetî xêrêko pîl o ke zîyaretê mexdûranê erdlerzî bêrê kerdene û cewabê îhtîyacanê înan bêro dayene. Ganî pêro misilmanî herêma erdlerzî zîyaret bikerê û roşanê mexdûran fîraz bikerê.

Bi wesîleya roşanî ma venga pêro misilmanan û şaranê Rojhelatê Mîyanênî danê ke vera faşîstan, îqtîdarperestab, dişmenanê komelî, bazirgananê dînî û mezhebperestab têkoşînêkê hemparî bikerê. Coka ma reyna Roşanê Remezanî pêro misilmananê demokratîkan rê fîraz kenê. Ma hêvî kenê ke no roşan wa bibo wesîleya edalet, azadî û têdûştîye.''