Têgerayîşê Azadîye yê Komelê Kurdîstanî verê Ofîsê Iraqî yê Silêmanî de derheqê ablûqaya vera Mexmûrî de eşkerayîyêke daye û da zanayene ke dewleta tirke Iraq seba Mexmûrî pê 'şerê awe' tehdît kerdo.
Têgerayîşê Azadîye yê Komelê Kurdîstanî verê Ofîsê Iraqî yê Silêmanî de derheqê ablûqaya vera Mexmûrî de eşkerayîyêke daye.
Eşkerayîye de dîya zanayene ke hukmatê Kurdîstan û Iraqî bi hawayêkê raştî nêzdîyê Kampa Multecîyan a Şehîd Rûstem Cûdîyî ya Mexmûrî nêbenê û rixmê hêrişanê dewleta tirke zî kampe nêpawenê. Eşkerayîye de ame parekerdene ke pêvînayîşan de selahîyetdaranê Iraqî roniştoxanê kampe rê vato ke eke kampe nêra vilakerdene dewleta tirke vera Iraqî şerê awe bikera.
Eşkerayîye wina dewam kena: ''Bi planê dewleta tirke, Iraq û PDKyî yeno waştene ke kampe vila biba. PDK herinda ke şarê kampe rê xizmet bikero 4 serrî yo kampe gêno binê ablûqa. Şarê Mexmûrî wazeno meseleyanê xo pê dîyalogan çareser bikero.''
Dima nameyê KNKyî ser o Salar Mehmûdîyî qisey kerd û vat: ''Herêma Kurdîstanî binê tehlukeyê îşxalî de ya. Ganî Neteweyê Yewbîyayeyî (NY) erkanê xo bîyarê ca.''
Endamê Komîsyonê Koçkerdiş û Koçberan ê Parlamentoyê Iraqî Soran Omarî vat: ''Çîyo ke Mexmûr de qewimîyeno planê dewleta tirke û Iraqî yê. Dewleta tirke Iraqî rê teda kena ke kampe biqefilna. Na kampe de cinî, sivîl û domanî est ê. Çew nêeşkeno pê tedaya Tirkîya kampe biqefilno. Seba Mexmûrî çi lazim o ma do bikerê. Çunke na meseleyêka neteweyî ya. Ganî pêro wekîlî vera ney vengê xo vejê.''
