Doktor Mihemed Unvero ke Kampa Multecîyan a Şehîd Rûstem Cûdîyî de wezîfe keno ANFyî rê qala rewşa krîzê tibî yê kampe kerde.

Dr. Unverî bale ante ambargoyê vera kampe ser û da zanayene ke kampe de xeylêk doman, cinî û kokimî est ê coka ambargoyêko winayên xelet o.

Unverî îfade kerd ke her roje zehmetîyî zêdîyenê û vat: ''Ambargo û xîretê ablûqakerdişî yê artêşa Iraqî ra meseleyî vera benê giranêr. Dewleta Iraqî emser nêverda ke malzemeyê tibî û dermanî bikewê kampe. Qasê hîrê serrî yo PKK qetî seba nêweşanê ma yê ecîlan budçe nêdano. Hewteyêkî ra nata ablûqaya artêşa Iraqî ra zî rewşa weşîye hîna bîye giran. Ma vera meseleyanê weşîyan nika tay komê gêrayoxî awan kerdî la hetê dermanan ra kêmasîyêka pîle est a. Ma bi îmkananê kêman xizmet danê şarî. Wextê serebûtanê ablûqakerdişî de zî kesêk birîndar bi. La seba ke ambulans nêdîya ma nêeşkayî nêweş berê nêweşxaneyî.''

Unverî ard ziwan ke cara kampe de krîzêko tibî yo giran est o la eke rewşe hîna biba giran ê do nêeşkê cewab bidê îhtîyacan.  Unverî vat: ''Ganî pêro merdimî vera na ablûqa û nê ambargoyî erkanê xo yê neteweyî û wijdanîyan bikerê.  No şar teda ra tîya de ciwîyeno û seba pêro kurdan xo ver dano. Coka ganî kurdî wayîrê Mexmûrî vejîyê û vera na rewşe bêveng nêmanê.''

Dr. Unverî venga rêxistinanê weşîye yê Neteweyanê Yewbîyayeyan, Xaçê Sûrî û Doktoranê Bêsînoran da ke şorê Mexmûrî û tede cigêrayîşan bikerê.