Endamê Komîteya Têkilîyanê Teberî ya Kampa Multecîyan a Şehîd Rûstem Cûdîyî ya Mexmûrî Bêwar Unverî derheqê xîretê ablûqakerdişî yê artêşa Iraqî û serebûtan de ANFyî rê qisey kerd.

Unverî da zanayene ke 20ê gulane de artêşa Iraqî pê wesayîtanê zirxînan û leşkeran kerd ke dormeyê kampe pê têlan û kuleyan bigêra la şarî destûr nêda ney. Unverî vat: ''Xoverdayîşê ma kerd ke artêşa Iraqî xo apey bigêra. Artêşa Iraqî îradeyê şarê ma dî. Domanan ra heta kokiman her kesî xoverdayîş de cayê xo girewt. Xoverdayîşê Mexmûrî hem artêşa Iraqî rayîrê ci ra açarna hem zî rayaumûmîya kurdan hayîdar kerde.''

Unverî îfade kerd ke Neteweyanê Yewbîyayeyan (NY) 1994 ra heta  hêrişanê DAÎŞî de roniştoxê kampe sey  multecîyanê sîyasîyan şinasnayêne la hêrişanê DAÎŞî ra dima xo apey anto. Unverî vat: ''NY vera hêrişan, ablûqa û ambargoyê PDKyî qetî tewir nêmojneno. Beno ke tesîrê dewleta tirke ra wina keno. La xoverdayîşê Mexmûrî yê vera ablûqa ra dima NY ame kampe. Înan ma rê vat ke do meseleyanê ma çareser bikerê la erk û mesuldarîyê xo nêkerdî.''

Unverî ard ziwan ke dewleta tirke qetî do hêrişanê xo yê vera Mexmûrî rê dewam bikera la şarê Mexmûrî zî vera nê hêrişan do tim xo ver bido. Unverî vat: ''Kampa ma wextê hêrişanê DAÎŞî de bedelê giranî dayî. 2017 ra nata zî dewleta tirke hewayî ra hêrişê kampe kena. Nê hêrişanê hewayî de zaf kesî şehîd bîyî, birîndar bîyî. Ma nê çîyî vistî rojdemê Iraqî. Goreyê qanûnanê mîyanneteweyîyan hukmatê Iraqî kampa ma bipawo. 

Xoverdayîşê Mexmûrî zaf ame destekkerdene coka tedayan ra hukmatê Iraqî xo apey ant. La reyna zî tehluke nêqedîyayo. Ganî şarê ma hişyar bibo. Ma sey şarê Mexmûrî wazenê ke meseleyan pê dîyalogan çareser bikerê. La ganî dewleta Iraqî zî nêba parçeya sîyasetê dewleta tirke. Ganî Iraq bi îradeyê xo têbigêro û NY zî erk û mesuldarîyanê xo bîyaro ca.''