Komîteya Rayberdişî ya PKKyî bi eşkerayîyêke şehîdê menga gulane yad kerdî.

Eşkerayîye wina ya:

''Ma dekewtî Menga Şehîdan. Her roja gulane de ma bi desan şehîdî dayî. Şehîdê ma yê verênî Hakî Karerî ra heta şehîda ma Gulçîya Gabar ma pêro şehîdanê xo bi rêz, heskerdiş û minetî yad kenê. Ma soz danê ke armancê înan ser bivisnê. Ma do na Menga Şehîdan de têkoşînê demokrasî û azadîye hîna aver berd, 14ê gulane de faşîzmê AKP-MHPyî birijnê, verê demokratîkbîyayîşê Tirkîya û Kurdîstanê Azadî abikerê.

Heyf ke nêzdîyê na Menga Şehîdan de Endama Konseya Fermandarîye ya YJA-Starî Gulçîya Gabar, gerîla Pelşîne Newroz, Endamê Fermandarîya Eyaletan Dilxwaz Gabar, Sozda Botan û Ciwana Omer zî şehîd bîyî. Ma nê şehîdanê xo bi rêzî yad kenê. Sere de şarê Mêrdîn û Botanî ma venga pêro şarê xo danê ke wa şehîdanê xo raşt fam bikero û bi xurtî wayîrê ci vejîyo.

Embaze Gulçîya Gabar pêro emrê xo na têkoşînê azadîye yê cinîyan û şarê kurdî ser. Aye çar parçeyanê Kurdîstanî de têkoşîn kerd, pê xeta azadîye ya Apogîre tim bawer kerd, qetî sereyê xo nêard war û tim qewet da partîbîyayîş û artêşbîyayîşî. Embaz Dilxwaz Gabarî her ca de gerîlatîye û fermandarîye kerde, derbê giranî dayî dişmenê faşîstî û bi wayîrê pratîkêkê girîngî. Bêguman sere de şarê Mêrdînî pêro cinî, ciwan û şarê Kurdîstanî wayîrê nê ewladanê xo vejîyê û mîyanê têkoşînê azadîye de înan bidê ciwîyayene.

Ma serrgêra 51. ya dardekerdişê înan de şorişgêranê serkêşan Denîz Gezmîş, Yusuf Aslan û Huseyîn Înan bi rêzdarî yad kenê. Nê hîrê şorişgêran vera Darbeya 12ê Adare bi xurtî têkoşîn kenê. Înan rayraşîyayîşê Tirkîyaya demokratîke û Kurdîstanê Azadî da destpêkerdene. Vîrameyîşê înan ewro mîyanê têkoşînê şorişgêran ê vera faşîzmê AKP-MHPyî de ciwîyenê. 14ê gulane de ma do derbêke bidê nê faşîzmî ro û rayîrê serkewtişê têkoşînê azadîye abikerê. Nê esasî ser o ma venga pêro şarê kurdî, şaranê Tirkîya, cinîyan, ciwanan, kedkar û karkeran danê ke bi xurtî tewrê weçînayîşan bibê, faşîzmê AKP-MHPyî birijnê, bi xurtî Îtîfaqê Kede û Azadîye bişawê Meclîsî û bi nê hawayî armancanê Denîz, Yusuf û Huseyînan bîyarê ca.

Dewleta Îranî 9ê gulana 2010î de 5 şorişgêr û welatperwerê kurdî Şîrîne Elemhûlî, Ferzad Kemanger, Alî Haydarîyan, Ferhat Wekîlî û Mehdî Îslamî darde kerdbî. Ma nê welatperweran bi rêzdarî û minetî yad kenê. Ma dî ke nê 13 serran de rixmê nê dardekerdişan zî şarê Îran û Rojhelatê Kurdîstanî qetî waştişê azadîye ra fek vera nêda û rayîrê şehîdan ser de bi şîarê 'Jin, Jiyan, Azadî' serewedaritişêko pîl da destpêkerdene. Bi na wesîle ma venga rejîmê Îranî danê ke wa goş bido waştişanê şarî û metodê şîdet û teda ra fek vera bido. Ma venga Hêzanê Azadîya Rojhelatê Kurdîstanî danê ke raştîya şehîdan hol fam bikerê, wayîrê şehîdan vejîyê û vîrameyîşanê înan têkoşînê azadîye de bipawê.

Ma lîderê DKP-BOGyî Ulaş Bayraktarogluyo ke 9ê gulana 2017î de Reqa de şerê vera DAÎŞî de şehîd bibi bi rêzdarî yad kenê. Embaz Ulaşî hem averşîyayîşê Şorişê Rojawanî rê hem zî averşiyayîşê HBDHyî rê kedêka pîle daye. Vîrameyîşê ey Şorişê Rojawanî û têkoşînê şorişgêrî yê Tirkîya de do tim gandar bimanê. Şarê kurdî û Tirkîya 14ê gulane de bi binvistişê AKP-MHPyî vîrameyîşê embaz Ulaşî do bipawê.

11ê gulana 1992yî de Tetwan de embaza ma Hozane Mizgîn şehîd bibi. Serrgêra 31. ya şehadetê ci de ma aye bi minet û rêzî yad kenê û soz danê ke armancanê ci ser bivisnê. Embaze Mizgîne Kurdîstan de gerîlatîye û hunermendîye kerdî yew û bi nê hawayî derbe daye ê kesanê ke eqsê ci îdîa kerdêne. 31 serrî yo xeta gerîlatîya hunermende ya embaze Mizgîne ciwîyena venga pêor hunermendan dana ke tewrê şer û hunermendîya raştikêne bibê. Ma pê bawer a ke no vengdayîş do raşt bêro famkerdene.

Şehîdê ma seke meşale yê ke verê ma roşnî kenê. Şehîdê ma vizêrê ma û ewroyê ma yê. Şehîdê ma qewetê ma yê esas ê. Têkoşîno ke faşîzmî birijno, tecrîdî bişikno û Rayber Apoyî azad bikero, do serkêşîya şehîdan de aver şoro û ser bikewo.

Nê esasî ser o ma reyna şehîdanê gulane bi rêz û minetî yad kenê. Ma venga pêro şarê xo û dostanê xo danê ke Menga Şehîdan de xeta şehîdan de têkoşînê azadîye hîna aver berê û her roje bi aktîvîteyan şehîdanê ma yê qehremanan yad bikerê!''