Endamê Komeleya Huqûqnasan a Seba Azadîye (OHD) Avûkat Firat Taşkinî derheqê binpaykerdişê heqanê merdiman, kerdişanê xiraban û îşkenceyê zîndanan de ANFyî rê qisey kerd.

Avûkat Taşkinî ard ziwan ke zîndanan de binpaykerdişê heqan sey sîstemêkî vurîyayî îşkenceyî û vat: ''Hetê sosyolojîk û psîkolojîkî ra zî îşkence yeno kerdene. Tepişteyê nêweşê ke nêeşkenê lazimîyanê xo peyda bikerê, nênê dermankerdene. Dezgehê Tipê Edlîyî (ATK) goreyê atmosferê sîyasîyî raporan dano tepişteyanê nêweşan. Heta nika 48 tepişteyanê nêweşan netîceya polîtîkayanê îşkenceyî de emser dinyaya xo bedilnaye. Qasê 1500 tepişteyê nêweşî zî binê tehlukeyî de yê. Tedawîya nînan nêna caardene û wextê sewqê nêweşxaneyî de nînan rê cigêrayîşo rût yeno ferzkerdene.

Zîndanan de pakî nêna kerdene, werdê qîmî nêdîyenê coka tepişteyî bêvîtamîn manenê. Bi nê hawayî tepişteyan de nêweşê kronîkî vejîyenê. Tedayê zîndanî vurîyayî îşkence. Tepişteyî bi hawayêkê keyfî surgunê şaristananê winasênan yenê kerdene ke keyeyanê înan ra dûrî de yê. Tedayê sosyalojîkî yê winasênî benê sebebê texrîbatê pîlî.''

Taşkinî vist vîrî ke vera tepişteyan polîtîkaya gef, cezaya dîsîplînî û tecrîdî yena caardene û vat: ''Tepişteyan rê poşmanîye yena ferzkerdene. Reyna pê kameran koxûşî yenê teqîbkerdene ke no tacîz o. Tepişteyî hetê îdare û heyetê çimdarîye ra rixmo ke cezaya înan qedîyena, vera nêdîyenê. Ganî dezgehê huqûq û heqanê merdiman bi tewirêkê hemparî têbigêrê û raporanê xo dezgehanê merdiman û yewinanê muhakemekerdişî de pare bikerê. Vera nê teda û polîtîkayan ganî yew hesasî bêra awankerdene.''