Qedexeyê çalakîyan û aktîvîteyan o ke  5 serrî yo bi hewayêkê sîstematî Wan de  yeno domnayene hetê Mehkemeya Îdareyî ya Herême ya Erziromî ra zî ame tesdîqkerdene.

Baroyê Wanî semedê wedaritişê qedexeyê çalakîyan û aktîvîteyan o ke hetê Walîtîya Wanî ra 5 serrî yo yeno domnayene 2019î de muracatê Mehkemeya Îdareyî ya 3. ya Wanî kerd. Walîtîya Wanî pawitişê xo de îdîa kerd ke çalakîyê kuçeyan xizmetê PKK û KCKyî kenê, coka ganî bêrê qedexekerdene. Naye ser o mehkeme waştişê baroyî red kerd.

Dima ra avukatanê Baroyê Wanî ra Mahmut Kaçanî dewa kirişte Mehkemeya Îdareyî ya Herême ya Erziromî (Îstînaf). Na mehkeme zî sey Walîtîye û Mehkemeya Wanî qerar girewt. Mehkeme qerarê qedexeyî sey qerarêkê cade yo, raşt o hesipna û vat wedaritişê ci hewce nêkeno.

Avûkat Mahmut Kaçanî ke derheqê babete de qisey kerd nê vatî:  ''Wan de 5 serrî yo bi hewayêkê sîstematî qedexeyê çalakîyan û aktîvîteyan yeno domnayene. Dewayê ke ma vera nê akenê yenê redkerdene û pîya bi qerarê Mehkemeya Îstînafî qedexeyî sey huqûqî yenê hesibnayene. Walîtîya Wanî bi destê hukmî heqanê bingeyîyan werte ra wedarnena. Vera nê do têkoşînê ma yê huqûqî dewam bikero.''