Amedî ra dima Wan de zî semedê tepişteyanê nêweşan Nobeta Edaletî dîyaye destpêkerdene. Merdimanê tepişteyan ê nêweşan Îbrahîm Alkan, Emrah Abî û Sînan Karelî Baroyê Wanî de  dest pê çalakîye kerde.

Cinîya Îbrahîm Alkanî Dîlşahe Alkan bale ante rewşa giran a mêrdeyê ci ser û vat û nêeşkeno zîndan de bimano. Alkane vat: Mêrdeyê mi bîlasebeb, têna seba ke kurd o zîndan de yeno tepiştene û zaf nêweş o. Ganî edalet bêro caardene û o cade bêro veradayene.

Dayîka Emrah Abî yo ke cezaya 66 serran dîyaye ci, Asya Abî zî ard ziwan ke lajê ci 10 serrî yo zîndan de yo waşt wa bêro veradayene. Asya Abî vat: Waştişê ma oyo ke wa edalet bêro caardene. Ez veng dana merdimanê tepişteyan ke wa tewrê çalakîye bibê. Ma çend bizêdîye waştişê dahîna lez yeno caardene.

Dayîka Sînan Karelî Zeynepe Dayan zî vat: Çîyo ke ma rê yeno kerdene zulm o. Ganî no zulm hinî biqedîyo. Seba ke çalakîya ma ser bikewo ganî paştî bidîyo ma.