Gerîlayanê HPGyî Kajîn Rojînda û Çiya Zagrosî bi wesîleya serrgêra şehadetê Zîlane (Zeynepe Kinaci) derheqê çalakîya Zîlane û Menga Fedayîtîye ya Hezîrane de ANFyî rê qisey kerd.

Çiya Zagrosî ard ziwan ke menga hezîrane seba PKK û şarê kurdî mengêka winayên a ke tede xeylêk birê girîngî ameyê girewtene û vat: ''Çalakîya Zîlane çalakîyêka normale nîya. Çunke vera Komployê serê rayberîye bi çêrî û bawerî ameya kerdene. O çax şerê gerîlayan teng bibi, dişmenî no kerd firsend û waşt ke vera Rayberîye suîkastêk bikero. Zîlane pê hesîyaya ke şexsê Rayberîye de vera şarê kurdî xîretê çinkerdişî est o dormeyê Rayber Apoyî de çemberêko adirin viraşt. Embaze Zîlane bi çalakîya xo vera xeta tasfîyekere û dişmenî xo vurna kerd adir. Embaze Zîlane bi çalakîya xo bîye xete. Na xete ewro Zap, Metîna û Avaşîn de bi bawerîyêka pîle ciwîyena. Ma sey gerîlayan soz danê ke nê mîrasî gandar biverdê.''

Gerîlayê HPGyî Kajîn Rojîndayî zî pê hesna ke Rayberê Şarê Kurdî Abdullah Ocalan têkoşînê cuya azade yo û Zîlane zî bi na hişmendî têgêraya. Rojîndayî vat: ''Vera xîretê çinkerdişê dewleta tirke şarê ma şexsê Rayberîye de rolêko pîl kay kerd. Embaze Zîlane bi çalakîya xo ya fedayîye no çi mojna; zorbazîye çend bêra kerdene zî kurdî do tim est bê û têkoşîn bikerê. Ma na xete û bawerîye ser o têkoşîn kenê. Dişmen çend çekan bişuxilno zî serkewtiş ê ma yo.''